وزیر مملکت اطلاعات و نشریات فرخ حبیب نے کہا ہے کہ پاکستان ہر عالمی فورم پر چین کے ساتھ کھڑا ہے۔

تفصیلات کے مطابق وزیر مملکت اطلاعات و نشریات فرخ حبیب نے فیصل آباد اور چین کی سسٹر سٹی چنگ داؤ کے درمیان تعاون کے معاہدے کی تقریب سے خطاب کرتے ہوئے کہا کہ چین کے سفیر، سسٹر سٹی کے مئیر، دونوں ممالک کے حکام  کو اس تقریب میں شرکت پرخوش آمدید کہتے ہیں، پاکستان میں چین کے سفیر نونگ رونگ، چین میں پاکستان کے سفیرمعین الحق، چین کے شہر چنگ داؤ کے مئیر ژاؤ ہاؤزی، کمشنر فیصل آباد بھی تقریب میں شریک تھے۔

وزیر مملکت فرخ حبیب نے کہا کہ پاک چین اقتصادی راہداری منصوبہ (سی پیک) فلیگ شپ منصوبہ ہے، پاکستان ہر عالمی فورم پر چین کے ساتھ کھڑا ہے، دونوں ممالک کی سسٹر سٹیز کے مابین معاہدے سے صنعتی تعاون، دونوں ممالک کے عوام کے مابین تعاون، بزنس ٹو بزنستعاون، کلچراور سائنس اینڈ ٹیکنالوجی کے شعبے میں تعاون ہوگا۔

وزیر مملکت کا کہنا تھا کہ میری دعوت پر چین کے سابق سفیر یاہو جنگ نے فیصل آباد کے دو روزہ دورے میں کاروباری شخصیات سے ملاقاتیں، زراعی یونیورسٹی کا دورہ اور دیگر سرگرمیوں کا حصہ بنے اور  جس کا مقصد دو طرفہ تعاون یقینی بنانا ہے، اسی دورے کے دوران میری درخواست پر سسٹر سٹی معاہدے پر کام کا آغاز ہوا اور موجودہ چینی سفیر نونگ رونگ نے اس منصوبے کو عملی جامعہ پہنایا۔

 فرخ حبیب نے کہا کہ فیصل آباد صنعتی شہر ہے جہاں بہترین روڈ انفراسٹرکچر، زرعی زمین اور علامہ اقبال اقتصادی زون ہے، فیصل آباد شہر کے ساتھ سسٹر سٹی معاہدے پر پاکستان میں چین اور چین میں پاکستان کے سفیر، میئر اور میونسپلٹی حکام کا شکریہ ادا کرتے ہیں۔

وزیر مملکت اطلاعات و نشریات فرخ حبیب کا کہنا تھا کہ سسٹر سٹیز معاہدے کو مزید موثر بنانے کے لئے چین کے شہر مئیر ژاؤ ہاؤزی کو پاکستان دورے کی دعوت دیتے ہیں۔

چین کے سفیر نونگ رونگ نے کہا کہ مجھے فخر ہے کہ میں چنگ ڈاؤ اور فیصل آباد سسٹر سٹی کے درمیان معاہدے کی تقریب میں شریک ہوں، چین، شنگھائی تعاون تنظیم لوکل اکنامک اینڈ ٹریڈ کوآپریشن ڈیمونسٹریشن زون اور فیصل آباد اقبال انڈسٹریل پارک کے درمیان تعاون کی یاداشت پر دستخط کی پروقار تقریب کا حصہ ہوں، دونوں ممالک کے رہنماؤں کی مشترکہ رہنمائی کے تحت، چین اور پاکستان نے صوبوں اور شہروں کے درمیان دوستانہ تعلقات کے دس سے زائد پیئرز بنائے ہیں، امید ہے کہ چنگ ڈاؤ اور فیصل آباد سسٹر سٹی، تعلقات قائم کرنے کے لیے  دوستی پل کا کردار ادا کریں گے۔