رکن قومی اسمبلی آفتاب جہانگیر نے کہا ہے کہ  بلاول ماموں بن گئے ہیں لیکن عوام کو ماموں نہ بنائیں۔

 تفصیلات کے رکن قومی اسمبلی آفتاب جہانگیر نے واٹر بورڈ کے ہیڈ آفس میں پانی کے حوالے سے احتجاج سے خطاب کرتے ہوئے کہا کہ یہ احتجاج کرنے والے شوق میں نہیں بلکہ مجبوری میں آئیں ہیں، ان ماؤں کو اپنے بچوں کیلئے پانی چاہیے۔

رکن قومی اسمبلی آفتاب جہانگیر کا کہنا تھا کہ سندھ حکومت کراچی کے عوام کو پانی سے محروم کرکے ظلم کررہی ہے، ہم اپنے حلقوں میں جاتے ہیں تو لوگ پانی کی شکایت کرتے ہیں، سندھ حکومت کو ٹینکر کی مدد سے مال مل رہا ہے۔

  رکن قومی اسمبلی آفتاب جہانگیر نے کہا کہ وزیر اعظم عمران خان سے گزارش ہے کہ اٹھارویں ترمیم سے ہماری جان چھڑوائیں۔

دوسری جانب رکن سندھ اسمبلی رابستان خان نے واٹر بورڈ کے ہیڈ آفس میں پانی کے حوالے سے احتجاج سے خطاب کرتے ہوئے کہا کہ آج ضلع غربی کے لوگ اپنے حق کیلئے نکلے ہیں، ہم کئی بار اسمبلی میں کہہ چکے ہیں کہ پانی مافیا کا ایک سسٹم ہے، سسٹم کا سربراہ آصف زرداری ہے۔

 رابستان خان کا کہنا تھا کہ ایم ڈی واٹر بورڈ اس سسٹم کا موہرا ہے، انہیں بس پیسہ چاہیے، انہیں اس پیسے سے بلاول ہاؤس چلانا ہے، یہاں ایم ڈی واٹر بورڈ یزید کا کردار نبھا رہا ہے۔

رکن سندھ اسمبلی رابستان خان نے کہا کہ ہم نے ایم ڈی کو پانی کیلئے درخواست کی تو کہا گیا سسٹم کے ذریعے آئے، عوام کو اپنے حق کیلئے نکلنا ہوگا، یہ سسٹم کراچی کو کربلا بنا رہے ہیں، زرداری کراچی کیلئے ایک بیماری ہے۔