وفاقی وزیر منصوبہ بندی اسد عمر نے کہا ہے کہ یکساں نصاب تعلیم پی ٹی آئی کا بڑا کارنامہ ہے۔

اسلام آباد میں وفاقی وزیر منصوبہ بندی اسد عمر بہارہ کہو جلسے سے خطاب کرتے ہوئے کہا کہ اسلام آباد کے کام علی نواز اعوان کی محنت کے بغیر ممکن نہیں تھے، علی نواز اعوان اسٹار پرفارمر ہے، اسلام آباد کے باسیوں کے لیے ملازمتوں میں کوٹہ نہیں تھا یہ ہماری تحریک پر فیصلہ ہوا 50 فیصد کوٹہ ملازمتوں میں رکھا گیا۔

اسد عمر کا کہنا تھا کہ ہم نے پنجاب حکومت کے تعاون سے 2 ملین گیلن پانی راول ڈیم سے لیا، شہر میں 100 نئے ٹیوب ویل لگ رہے ہیں، اسلام آباد کے لیے 100 ایم جی ڈی پانی کا منصوبہ 6 ماہ میں شروع ہو جائے گا، یکساں نصاب تعلیم پی ٹی آئی کا بڑا کارنامہ ہے۔

انہوں نے کہا کہ وفاقی دارالحکومت میں 4 نئے کالجز بن رہے ہیں، اسلام آباد میں دسمبر تک صحت سہولت کارڈ دے دیے جائیں گے، صحت سہولت کارڈ جیسی سہولت امریکہ میں بھی موجود نہیں۔

وفاقی وزیر منصوبہ بندی اسد عمر کا کہنا تھا کہ این اے 53 میں 200 بیڈ کا ہسپتال بن رہا ہے، ترقیاتی منصوبوں پر کام اس لیے ممکن ہوا کیونکہ ہماری حکومت میں کرپشن نہیں ہو رہی۔