وفاقی وزیر قانون فروغ نسیم نے کہا ہے کہ میں حق اور سچ کا ساتھ نہیں چھوڑوں گا چاہے کوئی کچھ بھی کرلے۔

تفصیلات کے مطابق وفاقی وزیر قانون فروغ نسیم نے کراچی میں چھٹی قومی عدالتی کانفرنس سے خطاب کرتے ہوئے کہا ہے کہ رول آف لاء کا مطلب ہے کہ قانون سب کے لیے برابر ہوگا ، چاہے کوئی طاقتور ہو یا کسی بھی عہدے پر فائز ہو۔

انہوں نے کہا کہ اگر طاقتور آدمی کا احتساب نہیں کیا تو قوم پستی کی طرف جائے گی ، عوام فیصلہ کرے گی کہ کیا وکلاء نے عوام کو قیادت فراہم کی ، کہا گیا کہ وزیر قانون کچھ نہیں کررہا ، عدالتی فیصلوں  کی ذمہ داری عدالتوں اور وکلاء کی ہے۔

وفاقی وزیر قانون فروغ نسیم نے کہا کہ ملکیت کے قانون پر بل لائے تو وکلاء نے مخالفت کی کہ کیس کم ہوجائیں گے ، چاہے جتنی مخالفت ہو مجھے پرواہ نہیں ، میں حق اور سچ کا ساتھ نہیں چھوڑوں گا چاہے کوئی کچھ بھی کرلے۔

فروغ نسیم نے کہا کہ ٹرائل کورٹ کے ایسے ججز قتل کردیے گئے جو ریکارڈز تبدیل کردیتے تھے ، اب الیکٹرانکلی ثبوت ریکارڈ کیے جائیں گے ، پورے عدالتی نظام کا مرکز انگریزی زبان میں ہے ، قانون سازی کررہے ہیں کہ ایس ایچ او کم از کم بی اے پاس ہو۔

انہوں نے کہا کہ عدالتی نظام میں فرانزک کی اہمیت پر بھی کام کیا جائے گا ، پولیس زبردستی مار دھاڑ کرکے ایک 161 کا بیان ریکارڈ کردیتی ہے ، ہمارے اینٹی ریپ لاء کی امریکہ اور برطانیہ نے بھی تعریف کی۔

وفاقی وزیر قانون فروغ نسیم نے کہا کہ نئے قانون کے تحت عورت کے کردار سے قطع نظر دیکھا جائے گا ، مسئلہ یہ ہے کہ میرے پاس اپنی تشہیر کرنے کا وقت نہیں ہے ، وزارت اطلاعات کو چاہیے کہ میرے کاموں کی تشہیر کرے۔