فلور ملز ایسوسی ایشن نے ہڑتال کی کال واپس لے لی۔

محکمہ خوراک اور فلور ملز کے درمیان گندم کی فراہمی کا تنازع طے پاگیا ہے۔

محکمہ خوراک سے معاملات طے پانے کے بعد فلور ملز ایسوسی ایشن نے آج سے پنجاب میں دی جانے والی ہڑتال کی کال مؤخر کردی ہے۔

فلور ملز ایسوسی ایشن پنجاب کے چیئرمین عاصم رضا کا کہنا ہےکہ محکمہ خوراک نے دوسرے اضلاع سے 25 فیصد گندم کوٹہ اٹھانے کی شرط ختم کرنے کا مطالبہ منظورکرلیا ہے، اس لیے منگل کو ہڑتال کی کال مؤخرکردی ہے۔

انہوں نے اس حوالے سے بتایاکہ ڈائریکٹر فوڈ وعدے کے مطابق کابینہ سے فوری منظوری لیں، آئندہ کے لائحہ عمل کیلئے آج پھر اجلاس ہوگا۔

واضح رہےکہ گزشتہ ہفتے فلورملز ایسوسی ایشن نے 15 نومبر سے جڑواں شہروں میں ہڑتال کا اعلان کرتے ہوئے عندیہ دیا تھا کہ منگل سے ہڑتال کا دائرہ پورے صوبے تک بڑھادیا جائے گا۔

ایسوسی ایشن نے دعویٰ کیاتھا کہ محکمہ خوراک نے گندم کی فراہمی روک دی ہے جس کی وجہ راولپنڈی اور اسلام آباد میں گندم کے سنگین بحران کا خطرہ ہے جو کہ پورے صوبے میں پھیل جائے گا۔

محکمہ خوراک پنجاب کا کہنا تھا کہ صوبے میں گندم کی قلت نہیں ہے، چند مل مالکان مصنوعی بحران پیدا کرنا چاہتے ہیں۔

اس حوالے سے ترجمان پنجاب حکومت حسان خاور نے کہاکہ اسٹاک میں 32 لاکھ ٹن گندم موجود ہے، روزانہ کی بنیاد پر 18 ہزار ٹن گندم ریلیز کر رہے ہیں۔

یادرہے کہ پنجاب، کے پی اور کراچی میں آٹے کی شارٹیج اور مہنگا ہونے کی شکایات بھی سامنے آرہی ہیں۔

مہنگائی کی چکی میں پسے شہری مطالبہ کررہے ہیں کہ کم از کم گندم کی قیمت کو ہی کنٹرول کرکے اس تک رسائی آسان بنائی جائے۔