غلام سرور خان نے کہا ہے کہ نوازشریف تابوت میں آ سکتے ہیں، زندہ آئے تو جیل جائیں گے۔

وفاقی وزیر برائے ہوا بازی غلام سرور خان نے  میڈیا سے گفتگو کرتے ہوئے کہا ہے کہ پی ڈی ایم میں بھی میر جعفر اور میرصادق ہیں ، وہی میر جعفر اور میر صادق آج اکٹھے ہو رہے ہیں۔

انہوں نے کہا کہ چھرا گھونپنے اور کھانے والے آج اپنا مال بچانے کے لیے اکٹھے ہو رہے ہیں ، پی ڈی ایم کا اتحاد غیر فطری ہے ، اپوزیشن اور پی ڈی  ایم حکومت کے لیے کوئی چیلنج نہیں ہے ، اتحادیوں کو 2 ، 2 وزارتیں دی گئیں ، ناراضگی کا کوئی جواز نہیں بنتا۔

وفاقی وزیر برائے  ہوا بازی نے کہا کہ ٹی ایل پی سے ہونے والا معاہدہ پاکستان کے لیے موثر  ثابت ہو گا ، نواز شریف زندہ واپس  آئیں گے تو جیل میں جائیں گے ، ہاں میاں صاحب تابوت میں آ سکتے ہیں، جس طرح ان کے خاندان کے آئے تھے۔

غلام سرور خان نے کہا کہ پیپلز پارٹی چوروں ڈاکوؤں کی جماعت ہے اسی لیے اسے خیرآباد کیا ، پی ڈی ایم کو دھرنے یا لانگ مارچ کی سیاست نہیں کرنی چاہیے۔

انہوں نے کہا کہ حکومت کے لیے چیلنج پی ڈی ایم نہیں بلکہ معاشی بدحالی اور مہنگائی ہے ، تیل و گیس کی قیمتیں ساری دنیا میں اوپر گئی ہیں۔

وفاقی وزیر برائے ہوا بازی غلام سرور خان نے کہا کہ شہبازشریف،آصف زرداری ، فریال تالپوراور خورشید شاہ ضمانت پر ہیں رہا نہیں ہوئے۔