رحمان ملک نے کہا ہے کہ پیپلز پارٹی نے عوام کو آئین اور ان کے بنیادی جمہوری حقوق کا شعور دیا۔

 سینیٹر رحمان ملک نے پیپلز پارٹی کے  یوم تاسیس پر کارکنوں کو مبارکباد دی اور شہدا کو خراج عقیدت پیش کرتے ہوئے کہا کہ آج کا دن سابق وزیر اعظم شہید ذوالفقار علی بھٹو اور پی پی پی کے بانی ارکان کو خراج عقیدت پیش کرنے کا ہے۔

انہوں نے کہا کہ سابق وزیر اعظم شہید ذوالفقار علی بھٹو اور پی پی پی کے بانی ارکان نے پاکستانی عوام کو ان کے بنیادی جمہوری حقوق سے روشناس کرایا ، اس دن ہم پارٹی کے ان شہدا کو سلام اور خراج عقیدت پیش کرتے ہیں ، پیپلز پارٹی واحد سیاسی جماعت ہے جو وفاق کی علامت ہے اور اس نے ہمیشہ وفاق کی اکائیوں کو مضبوط کیا ہے۔

رحمان ملک نے کہا کہ پیپلز پارٹی نے پاکستان، اس کی عوام کی بہتری اور جمہوریت کی مضبوطی کے لیے بے پناہ قربانیاں دی ہیں ، پارٹی کارکنان شہید ذوالفقار علی بھٹو اور شہید بینظیر بھٹو کے مشن کا حصہ بننے پر فخر محسوس کرتے ہیں ، شہید ذوالفقار علی بھٹو اور شہید محترمہ بینظیر بھٹو کے مشن کو آگے بڑھاتے ہوئے آصف علی زرداری نے بطور صدر نہ صرف جمہوریت کو بحال کیا بلکہ پارٹی کو دوبارہ متحرک کیا۔

سینیٹر رحمان ملک نے کہا کہ آصف علی زرداری نے مشکل ترین وقت میں قوم اور پارٹی کی قیادت کی ، عام آدمی کو ریلیف دینے کے لیے پیپلز پارٹی کے منشور پر عملدرآمد کے لیے بلاول بھٹو زرداری کا ساتھ دیں۔