چیئرمین واپڈا لیفٹیننٹ جنرل مزمل حسین (ریٹائرڈ) نے کہا ہے کہ واپڈا پانی اور پن بجلی کے شعبوں میں 10 میگا پراجیکٹس تعمیر کر رہا ہے۔

لیفٹیننٹ جنرل مزمل حسین (ریٹائرڈ) سے معروف عالمی مالیتی ادارے جے پی مورگن کے وفد نے ملاقات کی جس میں منصوبوں کی تعمیر کیلئے واپڈا کی نئی ہمہ جہت حکمتِ عملی پر تبادلہ خیال کیا گیا۔

چیئرمین واپڈا نے وفد سے گفتگو کرتے ہوئے کہا کہ واپڈا کی مالی حکمتِ عملی میں ماضی کے بر عکس قومی خزانے پر انحصار بہت ہی کم ہے، نئی حکمتِ عملی کے تحت 26 ارب ڈالر مالیت کے منصوبے تعمیر کر رہے ہیں، جس کی ملکی تاریخ میں مثال نہیں ملتی۔

ان کا کہنا تھا کہ واپڈا پاکستان کا واحد ادارہ ہے جس نے ریاستی ضمانت کے بغیر اپنی مستحکم مالی پوزیشن کی بنیاد پر گرین یورو بانڈ کا کامیاب اجراء کیا، واپڈا پانی اور پن بجلی کے شعبوں میں دیا مر بھاشا، مہمند اور داسو سمیت 10 میگا پراجیکٹس تعمیر کر رہا ہے جس کی لاگت 26 ارب ڈالر ہے۔

لیفٹیننٹ جنرل مزمل حسین (ریٹائرڈ) نے کہا کہ ملک کی تاریخ میں گزشتہ 50 برس کے دوران پانی اور پن بجلی کے اتنے منصوبوں کی بیک وقت تعمیر کی مثال نہیں ملتی، یہ منصوبے ایک نئی اور ہمہ جہت مالیتی حکمتِ عملی کے تحت تعمیر کئے جا رہے ہیں، واپڈا کی اِس حکمتِ عملی کی بنیاد واپڈا کے مؤثر مالیتی ڈھانچے اور مستحکم مالی پوزیشن پر ہے۔

واپڈا کے 10 زیرِ تعمیر منصوبوں کا ذکر کرتے ہوئے چیئرمین نے کہا کہ اِن منصوبوں کی بدولت پاکستان میں پانی ذخیرہ کرنے کی صلاحیت مزید 11 ملین ایکڑ فٹ بڑھ جائے گی اور قومی نظام میں تقریباً 9 ہزار میگاواٹ پن بجلی کا بھی اضافہ ہوگا۔

          ان کا کہنا تھا کہ واپڈا پانی اور پن بجلی کے منصوبوں کی نشاندہی اور تعمیر کے لئے قومی اہمیت کا بے مثال ادارہ ہے جس نے اپنے منصوبوں کی تعمیر کے لئے ایک ایسی مالی حکمتِ عملی ترتیب دی ہے جس کا ماضی کے برعکس قومی خزانہ پر انحصار بہت ہی کم ہے، واپڈا کی یہ حکمتِ عملی پاکستان میں پائیدار اور ماحول دوست اقتصادیات کے لئے نہایت اہم کردار ادا کرے گی۔

انہوں نے کہا کہ واپڈا بین الاقوامی مارکیٹ سے اپنی ضروریات کے مطابق فنڈز کا بندوبست جاری رکھے گا، ہم اُمید کرتے ہیں کہ واپڈا منصوبوں کی بدولت پاکستان میں ماحول دوست پن بجلی کے شعبہ میں مزید سرمایہ کاری آئے گی جس سے پاور سیکٹر کے اندر ماحولیاتی آلودگی میں بھی کمی واقع ہوگی۔

چیئرمین واپڈا لیفٹیننٹ جنرل مزمل حسین (ریٹائرڈ) نے مزید کہا کہ واپڈا پاکستان کا پہلا ادارہ ہے جس نے ریاستی ضمانت اور حکومت کی کسی بھی مالی ذمہ داری کے بغیر اپنی مستحکم مالی حیثیت کی بنیاد پر سرمایہ کاری کی بین الاقوامی مارکیٹ میں گرین یورو بانڈ کا اجراء کیا۔

چیئرمین نے واپڈا کے اولین گرین یورو بانڈ کے اجراء میں مرکزی ادارے کے طور پر جے پی مورگن کے کردار کی تعریف کی، مذکورہ بانڈ کے اجراء میں جے پی مورگن کے علاوہ اسٹینڈرڈ چارٹرڈ اور حبیب بینک بھی شامل تھے۔

اس موقع پر وفد میں آصف رضا منیجنگ ڈائریکٹر گلوبل کارپوریٹ بینک عمران زیدی امین ایم خواجہ چیف ایگزیکٹو پاکستان اور نوید اصغر ممبر فنانس (واپڈا) بھی شامل تھے۔