صدر مملکت ڈاکٹر عارف علوی نے کہا ہے کہ آئی ٹی گریجوایٹس کی تعداد بڑھانے کیلئے اقدامات کر رہے ہیں۔

ڈاکٹر عارف علوی سے ڈیجیٹل تعاون تنظیم (ڈی سی او) کے وفد کی ملاقات ہوئی، ملاقات میں سیکرٹری جنرل ڈی سی او، دیمہ الیحیٰ، سیکرٹری آئی ٹی محمد سہیل راجپوت نے شرکت کی۔

اس موقع پر صدر مملکت کا کہنا تھا کہ حکومت  کی مؤثر پالیسی کی وجہ سے پاکستانی آئی ٹی شعبے نے نمایاں کامیابیاں حاصل کیں، خواتین انفارمیشن ٹیکنالوجی کی مدد سے کاروبار اور تجارتی سرگرمیوں میں حصہ لے سکتی ہیں، آئی ٹی گریجوایٹس کی تعداد بڑھانے کیلئے اقدامات کر رہے ہیں۔

ان کا کہنا تھا کہ ملک میں ورچوئل ایجوکیشن کو فروغ دے رہے ہیں، نوجوانوں کو ہنر مند بنانے کا پروگرام ڈیجی اسکلز اب تک 10 لاکھ نوجوانوں کی تربیت کر چکا ہے، شہری اور دیہی علاقوں میں ڈیجیٹل خلیج کو کم کرنے کیلئے اقدامات لیے جارہے ہیں۔

انہوں نے کہا کہ ڈیجیٹل پاکستان ویژن کے تحت ڈیجیٹل انفراسٹرکچر کی بہتری اور ڈیجیٹل مہارت پیدا کرنے میں سرمایہ کاری کر رہے ہیں، حکومت پارلیمنٹ کی ڈیجیٹائزیشن 2023 میں مکمل ہوگی ، کارکردگی میں بہتری آئے گی۔

   صدر مملکت ڈاکٹر عارف علوی کا مزید کہنا تھا کہ ڈی سی او ڈیجیٹل تعاون بڑھانے اور ایک دوسرے کے تجربات سے سیکھنے کیلئے بہترین پلیٹ فارم ہے۔

سیکرٹری جنرل ڈی سی او نے پاکستان کو تنظیم کو ممبر بننے پر صدر مملکت ڈاکٹر عارف علوی مبارکباد دی، ان کا کہنا تھا کہ ڈی سی او پاکستان کو آئی ٹی شعبے میں غیر ملکی سرمایہ کاری کیلئے دلکش ملک کے طور پر پیش کرے گی۔

انہوں نے کہا کہ ڈیجیٹل تعاون تنظیم پاکستان کو کلاؤڈ سروسز کی فراہمی کرنے والے ملک کے طور پر اجاگر کرے گی، ڈی سی او خواتین اور نوجوانوں کو ڈیجیٹلی بااختیار بنانے کیلئے کام کرتی رہے گی۔

سیکرٹری جنرل ڈی سی او کا کہنا تھا کہ ڈی سی او خواتین، نوجوانوں کو نوکری تلاش کرنے کی بجائے نوکریاں پیدا کرنے کے قابل بنانے کیلئے کاوشیں کرے گی۔