سابق وزیر اعظم صدر پیپلز پارٹی وسطی پنجاب راجہ پرویز اشرف نے کہا ہے کہ ن لیگ سمیت دوسری حکومتوں نے صرف کاغذوں کی حد تک دعوے کیے۔

راجہ پرویز اشرف نے میڈیا سے گفتگو کرتے ہوئے کہا کہ پیپلز پارٹی کا ورکر اور عام آدمی پیپلز پارٹی کا جھنڈا تھام کر سڑک پر نکل آیا ہے، پیپلز پارٹی نے سرکاری ملازمین کی تنخواہوں میں ایک سو بیس فیصد اضافہ کیا، پینشن میں سو فیصد اور بینطیر انکم سپورٹ پروگرام سے لوگوں کے لیے سہولیات پیدا کیں۔

انہوں نے کہا کہ 3 لاکھ لوگوں کو مستقبل بنایا گیا، عام آدمی کے لیے آسانیاں پیدا کیں، ن لیگ سمیت دوسری حکومتوں نے صرف کاغذوں کی حد تک دعوے کیے، یہ حکومت 1 کروڑ نوکریاں اور 2 ارب ڈالر قرضہ واپس کرنے آئی تھی، عام لوگ یہ سوچ کر پی پی کے ساتھ نکلا ہے کہ ہم ان کے دکھوں کا مداوا کریں گے۔

سابق وزیر اعظم کا کہنا تھا کہ ہم تجربے کی بنیاد پر مہنگائی کو قابو میں لائیں گے اور بے روزگاری کو ختم کریں گے، رات کو سو کر اٹھیں تو پیٹرول کی قیمتیں بڑھی ہوتی ہیں، دوائیوں کی قیمتیں آسمانوں سے باتیں کر رہی ہیں، گھی کا ڈبہ 9 سو سے 2 ہزار پر پہنچ گیا ہے، یہ حکومت صرف زدی ہے، مہنگائی نے عوام کی کمر توڑ کر رکھ دی ہے۔

ان کا کہنا تھا کہ پیپلز پارٹی کے پاس صرف ایک راستہ ہے عوام، عوام کی آواز بلند کرنے کے لیے اپوزیشن کا اکٹھا ہونا ضروری ہے جو فیصلے عوام کے حق میں ہوں گے پیپلز پارٹی ان پر عملدر آمد کرے گی۔

سابق وزیر اعظم صدر پیپلز پارٹی وسطی پنجاب راجہ پرویز اشرف نے مزید کہا کہ پیپلز پارٹی ایک خاندان ہے اسی لیے ہم کہتے ہیں چاروں صوبوں کی زنجیر ہے، شہلا رضا صاحبہ الیکشن میں شامل ہونے یہاں خود آئی ہیں، اپوزیشن وزیر اعظم کے حلقہ انتخاب سے اکٹھے ہو کر جیتی تھی، اپوزیشن اکٹھی ہوتی تو عدم اعتماد کامیاب ہو جانی تھی۔