سرپرست اعلیٰ فلور ملز ایسوسی ایشن میاں ریاض نے فلورملنگ انڈسٹری کی گندم ریلیز پالیسی پر شدید تحفظات کا اظہار کیا ہے۔

فلور ملز ایسوسی ایشن کا چوتھا ہنگامی اجلاس ہوا جس میں سرپرست اعلیٰ میاں ریاض نے فلورملنگ انڈسٹری کی گندم ریلیز پالیسی پر شدید تحفظات کا اظہار کر دیا، ان کا کہنا تھا کہ تین روز بعد منگل کو ہڑتال کا باقاعدہ اعلان کریں گے۔

میاں ریاض نے کہا کہ مطالبات تسلیم کرنے کیلئے حکومت کو ایک ہفتہ کی ڈیڈ لائن دی گئی ہے، محکمہ خوراک کے اقدامات سے انڈسٹری میں بے چینی بڑھ گئی، محکمہ خوراک میں بے جا حراسمنٹ اور سختی کے ذریعے کرپشن کا بازار گرم ہے۔

اجلاس میں حافظ احمد قادر نے کہا کہ گندم کوٹہ کم از کم 18 بوری کیا جائے جبکہ بیرونی اضلاع سے 25 فیصد کوٹہ اٹھانے کی شق ختم کی جائے۔

فلورملز ایسوسی ایشن کا کہنا تھا کہ گندم گرائنڈنگ چارجز میں اضافہ کیا جائے، صوبوں کو سفید تھیلے میں آٹا ترسیل کی اجازت دی جائے جبکہ لال آٹے کی بجائے سفید آٹے کی اجازت دی جائے۔

سرپرست اعلیٰ فلور ملز ایسوسی ایشن میاں ریاض کا مزید کہنا تھا کہ مطالبات تسلیم نہ ہوئے تو ملز سرکاری گندم کوٹہ نہیں اٹھائیں گی۔

واضح رہے کہ اجلاس میں میاں جاوید، عبد الحمید بھٹی، محمد خالد، میاں ندیم، محمد عامر سمیت دیگر عہدیداران نے شرکت کی۔