گندم کی پیداوار میں اضافے کے لئے جاری 10 روزہ آگاہی مہم اختتام پذیر ہوگئی ہے۔

ہارون آباد میں وزیر اعظم پاکستان عمران خان کے زرعی ایمرجنسی پروگرام برائے گندم کی پیداوار میں اضافہ کے لئے جاری 10 روزہ آگاہی مہم اختتام پذیر ہوگئی، مہم کا اختتام ایک ریلی کی صورت میں کیا گیا جس میں محکمہ زراعت توسیع کے افسران، اسٹاف و عملہ اور زرعی یونیورسٹی فیصل آباد کے طلباء و طالبات نے کثیر تعداد میں شرکت کی۔

ریلی احاطہ محکمہ زراعت سے شروع کر ہو کر بنگلہ روڈ، قائد اعظم روڈ سے ہوتے ہوئی محکمہ زراعت کے احاطہ میں آکر اختتام پذیر ہوئی۔

اس موقع پر اسسٹنٹ ڈائریکٹر توسیع چوہدری لطیف اللہ کا کہنا تھا کہ اس 10 روز میں زرعی یونیورسٹی فیصل آباد کے تقریباً پونے 2 سو کے قریب طلبا و طالبات نے زرعی توسیعی عملہ کے ساتھ مل کر دن بھر کسانوں کے ساتھ مصروف عمل رہے۔

ان کا کہنا تھا کہ اس سلسلے میں روڈ شوز کے ساتھ ساتھ گندم کی جدید ٹیکنالوجی کے حوالے سے تیار کردہ تشہیری مواد گھر گھر تقسیم کرنے کے ساتھ ساتھ دیگر سمینار میں شرکت کی۔

انہوں نے کہا کہ اس عمل سے نہ صرف نوجوان طلبہ کو کسانوں کے عملی اقدامات سے ہم آہنگ ہونے کا موقع میسر ہوا بلکہ کلاس روم اور لیبارٹریز سے نکل کر زمینی حقائق کا ادراک بھی حاصل ہوا۔

اسسٹنٹ ڈائریکٹر توسیع چوہدری لطیف اللہ نے مزید کہا کہ قوم کے بیٹے اور بیٹیاں اپنے اساتذہ کے ہمراہ وطن کی مٹی سے محبت کا قرض چکانے کے لئے جس طرح فیلڈ میں نکلے ہیں اس کے انتہائی مثبت نتائج بر آمد ہوں گے۔