محمود خان نے کہا ہے کہ سرکاری املاک کا تحفظ حکومت کی ذمہ داری ہے۔

 وزیر اعلیٰ خیبر پختونخوا محمود خان کی زیر صدارت امن و امان سے متعلق اہم اجلاس ہوا جس میں چارسدہ میں پیش آنے والے واقعے کے خصوصی تناظر میں امن و امان کی صورتحال کا جائزہ لیا گیا۔

اجلاس میں پولیس حکام کی واقعے کے مختلف پہلوؤں اورصورتحال کوکنٹرول کرنےکے لئے اقدامات کے بارے میں بریفنگ دی گئی۔

 بریفنگ دیتے ہوئے بتایا گیا کہ مشتعل ہجوم کی طرف سے ایک پولیس اسٹیشن اور مختلف چوکیوں کو ریکارڈ سمیت نذر آتش کیا گیا ، بعض عناصر اور جرائم پیشہ افراد نے عوام کو سرکاری املاک کو نقصان پہنچانے پر اکسایا۔

اجلاس میں بتایا گیا کہ قرآن کی بے حرمتی کرنے والے شخص کو گرفتار کرکے اس کے خلاف مقدمہ درج کر لیا گیا ہے ، سرکاری املاک کو نقصان پہنچانے کے لئے لوگوں کو اکسانے والے عناصر کی نشاندہی کرلی گئی ہے۔

اجلاس میں مشتعل ہجوم کی طرف سے سرکاری املاک کو آگ لگانے کے واقعے کی مذمت کی گئی اور قانون کوہاتھ میں لینےوالےعناصر کے خلاف سخت کارروائی عمل میں لانے کا فیصلہ کیا گیا۔

وزیر اعلیٰ خیبر پختونخوا نے کہا کہ قرآن پاک کی بے حرمتی انتہائی افسوسناک واقعہ ہے ، قرآن کی بے حرمتی کرنے والے شخص کو قانون کے مطابق سخت سے سخت سزا دلائی جائے گی ، حکومتی رٹ کو چیلنج کرنے والوں کے خلاف آہنی ہاتھوں سے نمٹاجائے گا۔

محمود خان نے کہا کہ پولیس حکومتی عملداری اور قانون کی بالادستی کو ہر صورت یقینی بنائے ، امن و امان کو برقرار رکھنا اور سرکاری املاک کا تحفظ حکومت کی ذمہ داری ہے، اسے ہر قیمت پر یقینی بنایا جائے گا ، آئندہ ایسے واقعات کی موثر روک تھام کے لئے لائحہ عمل تیار کیا جائے ، اس واقعے میں  تمام شرپسند عناصر کی نشاندہی کرکے ان کے خلاف کارروائیاں عمل میں لائی جائیں۔

انہوں نے کہا کہ قران پاک کی بے حرمتی کرنے والے کے خلاف شہریوں کے جذبات کا احساس ہے ، شہری پرامن رہیں اور قانون کو اپنا راستہ اپنانے دیں ، قرآن پاک کی بے حرمتی کرنے والے کو قانون کے مطابق سزا دلائی جائے گی۔

واضح رہے کہ اجلاس میں چیف سیکرٹری،  آئی جی پی، ایڈیشنل چیف سیکرٹری،  سیکرٹری داخلہ اور دیگر متعلقہ حکام نے شرکت کی۔