فیصل آباد جڑانوالہ روڈ پر ٹیکسٹائل مل میں آگ لگ گئی ہے۔

تفصیلات کے مطابق ریسکیو گیارہ 22  کی گاڑیاں آگ بجھانے میں مصروف ہیں، آتشزدگی کے باعث بڑی مقدار میں کپڑا لپیٹ میں آگیا ہے تاحال کسی جانی نقصان کی اطلاع نہیں ملی۔

ریسکیو کا کہنا ہے کہ آگ کی وجہ سے قریبی گھروں اور عمارتوں کو خالی کروایا جا رہا ہے، چار کنال کے رقبے پر محیط کپڑے کا گودام مکمل طور پر جل کر راکھ ہوگیا ہے جبکہ چھت گودام کی بھی گر گئی۔

ریسکیو کے مطابق آگ نے ساتھ والی عمارتوں کو بھی اپنی لیپٹ میں لینا شروع کر دیا ہے، ریسکیو اہلکار آگ پر قابو پانے میں مصروف ہیں جبکہ سول ڈیفینس اور ضلعی انتظامیہ کے عہدیدار بھی جائے وقوعہ پر موجود ہیں۔

ذرائع کا کہنا ہے کہ اسسٹنٹ کمشنر سٹی صاحبزادہ محمد یوسف موقع پر پہنچ گئے، آگ کی شدت میں مسلسل اضافہ ہو رہا ہے تاحال آگ لگنے کی وجہ معلوم نہیں ہو سکی۔

وزیر اعلیٰ پنجاب سردار عثمان بزدار نے فیصل آباد میں فیکٹری میں آتشزدگی کے واقعے کا نوٹس لے لیا اور کمشنر فیصل آباد ڈویژن سے رپورٹ طلب کرلی، عثمان بزدار نے آتشزدگی پر قابو پانے کیلئے تمام ضروری وسائل بروئے کار لانے کی ہدایت کی۔

 ان کا کہنا تھا کہ انتظامیہ ریسکیو 1122 اور متعلقہ ادارے آتشزدگی پر قابو پانے کیلئے ہر ممکن اقدام کریں، انتظامی افسران موقع پر موجود رہیں اور امدادی سرگرمیوں کی مانیٹرنگ کریں۔

وزیر اعلیٰ پنجاب سردار عثمان بزدار نے آتشزدگی کے واقعے کی تحقیقات کا حکم دے دیا۔