بالی ووڈ فلم ’سوریاونشی‘ کو عالمی سطح پر شدید تنقید کا سامنا کرنا پڑ رہا ہے۔

تفصیلات کے مطابق بالی ووڈ  فلم ساز روہیت شیٹی کی فلم’سوریا ونشی‘میں اسلام مخالف مواد دکھایا گیا ہے۔

بالی ووڈ  فلم ساز روہیت شیٹی کی حال ہی میں ریلیز ہونےو الی فلم’سوریا ونشی‘پر شدت پسندانہ خیالات اور مسلمانوں کی منفی نمائندگی کے لیے شدید تنقید کی جارہی ہے۔

معروف امریکی جریدے واشنگٹن پوسٹ میں شائع ہونے والے رانا ایوب نامی صحافی کےایک آرٹیکل میں اس فلم کے بارے میں لکھا گیا ہے کہ’روہیت شیٹی کی فلم  جہاد کو غلط رنگ دے کر پیش کیے جانے کی سازش پھیلا رہی ہے۔

انہوں نے کہا کہ روہیت شیٹی کی فلم سوریا ونشی میں مسلمان مردوں کو ہندو خواتین یا لڑکیوں کو ورغلانے یا اغوا کرنے اورپھر انہیں زبردستی اسلام قبول کرنے پر مجبور کرتے ہوئے دکھایا جارہا ہے جوکہ بہت خطرناک ہے۔

اس حوالے سے رانا ایوب کا کہنا ہے کہ فلم کی کامیابی نفرت اور امتیاز کا ماحول کو جنم دے گی، جس کا اندازے کے مطابق ہندوستان کے 200 ملین مسلمانوں کو روزانہ سامنا کرنا پڑتا ہے۔

یاد رہے کہ ایک اور معروف امریکی جریدے نیویارک ٹائمز نے بھی روہیت شیٹی کی اس ایکشن فلم کو غیر ذمہ دارانہ قرار دیا ہے۔

نیویارک ٹائمز  میں روہیت شیٹی  کی فلم کے بارے میں لکھا گیا کہ شیٹی کی فلموں میں ہنسنے اور ہنسانے کے لیے استعمال کیے جانے والے ہتھکنڈے ہمیشہ ہی قابلِ تنقید ہوتے ہیں، لیکن سوریا ونشی میں تو ہدایتکار کی جانب سے انتہائی غیر ذمہ دارانہ روّیہ اختیار کیا گیا ہے۔

نیویارک ٹائمز میں فلم کے بارے مزید لکھا گیا ہے کہ یہ فلم پولیس کی بربریت کے خوشگوار مناظر اور مسلمانوں کے بارے میں خطرناک اور دقیانوسی تصورات سے بھری ہوئی ہے۔

دوسری جانب  پاکستان فلم و ٹی وی انڈسٹری کی معروف اداکارہ و تمغۂ امتیاز مہوش حیات نے اکشے کمار کی نئی فلم سوریاونشی پر ناپسندیدگی کا اظہار کیا۔

اداکارہ نے مائیکرو بلاگنگ ویب سائٹ ٹوئٹر پر بالی ووڈ کی نئی فلم سوریاونشی  پر ناپسندیدگی کا اظہار کرتے ہوئے کہا تھا کہ سوریاونشی بالی ووڈ کی اسلامو فوبیا کو فروغ دینے والی تازہ ترین فلم ہے ۔

“Sooryavanshi”is the latest film in Bollywood promoting islamophobia. The tide is turning in Hollywood & I hope that across the border they will also follow suit. As I’ve said, if not positive depictions,at least be fair in the way that you show Muslims. Build bridges not hatred! pic.twitter.com/DA7MUuVpKo

— Mehwish Hayat TI (@MehwishHayat) November 17, 2021

مہوش حیات نے لکھا تھا کہ ہالی ووڈ میں رجحان بدل رہا ہے اور انہیں امید ہے کہ سرحد کے اس پار بھی لوگ اس کی پیروی کریں گے۔

انہوں نے آخر میں لکھا تھا کہ فاصلہ کم کریں اور نفرتیں نہ پھیلائیں۔

واضح رہے کہ اکشے کمار کی نئی فلم  سوریاونشی باکس آفس پر تو دھوم مچا رہی ہے لیکن بہت سے لوگوں کے لئے اس فلم کے اسکرپٹ میں شاید ہی کوئی نئی یا حیران کن بات ہو، سوریا ونشی کی ریلیز کے ساتھ ہی بیشتر افراد کا کہنا ہے کہ اس فلم میں مسلمانوں اور پاکستان کی منفی تصویر کشی کی گئی ہے۔