عوامی نیشنل پارٹی خیبر پختونخوا کے صدر ایمل ولی خان نے کہا ہے کہ حکومت کی جانب سے بلدیاتی نظام کسی مذاق سے کم نہیں۔

عوامی نیشنل پارٹی خیبر پختونخوا کے صدر ایمل ولی خان نے پریس کانفرنس کرتے ہوئے کہا کہ بلدیاتی نظام آئین کی بھی نفی کرتا ہے، موجودہ بلدیاتی نظام میں ضلع کا تصور نہیں، بلدیاتی نظام میں ضلع بحال کیا جائے۔

ایمل ولی خان نے کہا کہ عدالت کے بلدیاتی انتخابات سے متعلق فیصلے کا خیر مقدم کرتے ہیں، عدالتی فیصلوں پر عملدر آمد کو یقینی بنائے جائے، بلدیاتی انتخابات کا انعقاد جماعتی بنیادوں پر کیا جائے، حکومت کا ڈر واضح ہے، عوام بلا سے نفرت کرتے ہیں، بلدیاتی انتخابات میں بلا کو عوام یکسر مسترد کرتے ہیں۔

ان کا کہنا تھا کہ پی ٹی آئی کی حکومت میں سب کچھ آرڈیننسوں پر چل رہا ہے، حکومت بلدیاتی انتخابات ملتوی کرنے کی پوری کوشش کر رہی ہے، اے این پی بلدیاتی انتخابات کا فوری انعقاد چاہتی ہے، بلدیاتی نظام میں اختیارات کی نچلی سطح پر منتقلی چاہتے ہیں، بلدیاتی انتخابات کے سلسلے میں بھرپور تیاری کر رہے ہیں، اب جنات کام نہیں کررہے ہیں، حالات بدل چکے ہیں، مذہبی جنونیت کو بڑھاوا دینے سے عوام کو نقصان پہنچا ہے۔

صدر ایمل ولی خان نے کہا کہ کالعدم ٹی ایل پی کس کی ایجاد کی؟ کالعدم ٹی ایل پی کا ہر دھرنا کس کے کہنے پر شروع اور ختم ہوتا ہے؟ دنیا کو دکھانے کے لیے کالعدم ٹی ایل پی پر پابندی عائد کی ہے۔

ان کا کہنا تھا کہ پنجاب میں کالعدم ٹی ایل پی کو تیسری بڑی قوت کے طور پر دکھایا جارہا ہے، آنے والے انتخابات کالعدم ٹی ایل پی اور پی ٹی آئی ایک ساتھ لڑیں گے، کالعدم ٹی ایل پی اور پی ٹی آئی دونوں جماعتیں مذہب کا نام استعمال کر رہی ہیں،۔

عوامی نیشنل پارٹی خیبر پختونخوا کے صدر ایمل ولی خان نے مزید کہا کہ دھرنے میں کس کا نقصان ہوا ہے؟ شہداء کا کون پوچھے گا؟ درجنوں قیدیوں کو رہا کیا گیا ہے، حکومت نے گھٹنے ٹیک دیئے ہیں، علی وزیر جیل میں کیوں ہے؟