وزیر اعظم کا کہنا ہےکہ یہ قانون سازی ذات کےلئے نہیں ملک کےلئے ہے۔

وزیراعظم عمران خان نے پارلیمانی پارٹی اجلاس سے خطاب کرتے ہوئے کہاکہ اورسیز ووٹنگ اورای وی ایم ملک اور جمہوریت کےلئے ضروری ہے۔

انہوں نے کہاکہ ارکان کو بلز سے متعلق بریفنگ دی گئی ،ای وی ایم اور اورسیز ووٹرز کو حق دینے سے جمہوریت مضبوط ہوگی،نمبرز پورے ہیں،کامیابی ہمیں ملے گی،ارکان ایوان میں حاضری یقینی بنائیں۔

وزیر اعظم عمران خان نے کہاکہ 1970 کے بعد تمام انتخابات پر اعتراض کئے گئے،چاہتے ہیں ایسا نظام بنائیں کہ تمام جماعتیں امیدوار نتائج کو تسلیم کریں۔

ان کا مزید کہنا تھا کہ انتخابی اصلاحات ذات یا پارٹی کےلئے نہیں ملک اور جمہوریت کےلئے ہے۔

 اجلاس کے آغاز سے قبل ایک صحافی نے وزیراعظم سے پوچھا کہ اتنی ملاقاتیں کررہے ہیں کیا پریشان ہیں؟

اس پر وزیراعظم نے جواب دیا کہ کوئی ملاقاتیں نہیں کررہا، کھلاڑی میدان میں ہر چیز کے لیے تیار رہتا ہے، جو بھی مخالف کرے گا میں اس سے بہتر کروں گا۔

واضح رہےکہ وزیراعظم کے زیرصدارت پارلیمانی پارٹی کے اجلاس میں اتحادی جماعتوں کے ارکان بھی شریک تھے۔

اجلاس میں پارلیمان کے مشترکہ اجلاس سے متعلق حکمت عملی طے  کی گئی جبکہ وزیراعظم نے بلوں پر ارکان کو اعتماد میں بھی لیا۔

دوسری جانب قومی اسمبلی میں اپوزیشن لیڈر شہباز شریف کا کہنا ہےکہ مشترکہ اجلاس میں اپوزیشن اپنا جواب دے گی۔

مسلم لیگ ن کے صدر شہبازشریف اور پاکستان پیپلز پارٹی کے چئیرمین بلاول بھٹو زرداری پارلیمنٹ ہاؤس پہنچ گئے ہیں۔

اس موقع پرمیڈیا سے گفتگو کرتے ہوئے انہوں نے کہاکہ ہمارے پاس اپنی تعداد پوری ہے، مشترکہ اجلاس میں اپوزیشن اپنا جواب دے گی۔

صحافی نے سوال کیا کہ حکومت کو ٹف ٹائم دیں گے یا شکست دیں گے۔

اس پرشہباز شریف نے کہاکہ ہمارے پاس عددی تعداد پوری ہے،جو اللہ کو منظور ہو گا وہی ہو گا انشااللہ۔