مشیر خزانہ شوکت ترین نے سندھ اور بلوچستان میں آٹے کی قیمتوں میں کمی لانے کی ہدایت کردی ہے۔

مشیر خزانہ شوکت ترین کی زیرِ صدارت نیشنل پرائس مانیٹرنگ کمیٹی کا اجلاس ہوا جس میں وفاقی وزراء، مشیروں، معاونین خصوصی اور وزارتوں کے سیکرٹریز نے شرکت کی۔

اجلاس میں سیکرٹری خزانہ نے بریفنگ دی کہ ہفتہ وار بنیادوں پر مہنگائی میں 0.67 فیصد کا اضافہ ہوا ہے جبکہ تین اشیاء کی قیمتوں میں کمی اور 20 اشیاء کی قیمتوں میں استحکام رہا، مختکف اشیائے ضروریہ کی قیمتوں میں کمی کا رجحان دیکھا گیا۔

سیکرٹری خزانہ کا کہنا تھا کہ پنجاب اور وفاقی دارالحکومت میں 20 کلو آٹے کا تھیلا 1100 روپے پر مل رہا ہے جس پر مشیر خزانہ شوکت ترین نے پنجاب اور وفاقی دارالحکومت میں 20 کلو آٹے کا تھیلا 1100 روپے پر فراہمی کی تعریف کی۔

اجلاس میں مشیر خزانہ نے سندھ اور بلوچستان میں آٹے کی قیمتوں میں کمی لانے کی ہدایت کی۔

سیکرٹری خزانہ کا کہنا تھا کہ پنجاب میں چینی کی قیمت میں مسلسل کمی کا رجحان ہے جس پر مشیر خزانہ نے ہدایت کی کہ دیگر صوبے چینی کی قیمتوں پر کنٹرول کیلئے اقدامات کریں۔

سیکرٹری خزانہ نے بریفنگ میں مزید کہا کہ حکومت کے اقدامات سے اشیائے ضروریہ کی فراہمی اور دستیابی بہتر ہوئی ہے۔