ترجمان پیپلز پارٹی فیصل کریم کنڈی نے کہا ہے کہ مراد سعید کی چیخیں کتابوں میں محفوظ ہیں۔

ترجمان پیپلز پارٹی فیصل کریم کنڈی نے وفاقی وزیر مواصلات مراد سعید کی پریس کانفرنس پر جواب دیتے ہوئے کہا کہ عوام کو پیکیج کا جھانسہ دیکر جادو گیری کے ذریعے لوٹا جا رہا ہے، مراد سعید کی چیخیں کتابوں میں محفوظ ہیں، رات کی تاریکی میں پٹرول قیمتوں میں اضافہ کر کے عوام کے جیب پر ڈاکا مارا گیا۔

انہوں نے کہا کہ عوام نالائق وزیر اعظم عمران خان کی نااہلی کا عذاب برداشت کر رہی ہے۔

واضح رہے کہ وفاقی وزیر مواصلات مراد سعید نے عوامی اجتماع سے خطاب کرتے ہوئے کہا تھا کہ سندھ کے اسکولوں میں استاد اور فرنیچر نظر نہیں آئیں گے، سندھ میں صحافی اورشہریوں کو آواز اٹھانے پر قتل کردیا جاتا ہے۔

انہوں نے کہا کہ سندھ میں آئندہ عمران خان کی حکومت ہوگی ، سندھ کےاسپتالوں میں ڈاکٹرز میسر نہیں ، سندھ حکومت نے شہر کراچی کو کچرے کا ڈھیر بنا دیا ہے ، فرزند  زرداری کاغریب سے تعلق ویسا ہی ہے جیسے انڈوں کا کلو سے۔

مراد سعید نے کہا تھا کہ نواز شریف بیماری کا بہانہ بنا کر بیرون ملک گئے ، پاکستان سیمی فائنل میں پہنچ گیا لیکن دوائی لینے کیلئے جانے والا نہیں آیا ، آج سارے چور اکٹھے ہو کرشور مچا رہے ہیں ، شریفوں اور زرداریوں کی شوگر ملز کی وجہ سے چینی مہنگی ہوئی ، شریفوں اور زرداریوں کوعوام کا درد ہے تو چینی سستی کریں۔

وفاقی وزیر مواصلات مراد سعید کا مزید کہنا تھا کہ حکومت غربت کے خاتمے کیلئے ہرممکن اقدامات کررہی ہے ، کے پی کے نے ہر شہری کو صحت کارڈ کی سہولت فراہم کی ہے ، خیبر پختونخوا کو دہشت گردی سے نکال کر ترقی کی راہ پر گامزن کیا۔