وزراعظم عمران خان کی زیرصدارت وفاقی کابینہ کا اجلاس کل ہوگا۔

وزیراعظم ہاؤس میں ہونے والے کابینہ کے اجلاس میں ملک کی سیاسی و معاشی صورتِ حال کا جائزہ لیا جائے گا۔

ذرائع کے مطابق وفاقی کابینہ کے اجلاس میں آٹھ نکاتی ایجنڈے پرتبادلہ خیال کیا جائےگا جبکہ کابینہ کو وزارتوں اور ڈویژنز میں خالی آسامیوں کے بارے میں بریفنگ دی جائے گی۔

ذرائع کا کہنا ہے کہ کابینہ وزارتِ دفاعی پیداوار ڈویژن کی سمری پر پی او ایف اینڈ ایچ آئی ٹی بورڈ میں منسٹیریل کوآرڈینشن ممبرکی تعیناتی کی منظوری دے گی۔

ذرائع کےمطابق میجرجنرل آصف حسین کو ڈی جی پاکستان رینجرز پنجاب تعیناتی کی منظوری دی جائے گی جبکہ کابینہ میجرجنرل محمد منیر افسر کی بہ طورآئی جی ایف سی کے پی ساؤتھ تعیناتی کی منظوری بھی دے گی۔

میجرجنرل کمال انورچوہدری کی بہ طورآئی جی ایف سی بلوچستان ساؤتھ (تربت) کی تعیناتی بھی ایجنڈے میں شامل ہوگی۔

دونوں آئی جیز ایف سی کی تعیناتیوں کی سمری وزارت داخلہ نے بھجوائی۔

وفاقی کابینہ وزارتِ آئی ٹی کی سمری پرممبرالیکٹرانک سرٹیفیکیشن ایکریڈیشن کونسل کی تقرری کی منظوری اور وزارت پاور ڈویژن کی سمری پرحیسکو کے سی ای او کو ہٹانے کی بھی منظوری دے گی۔

وزارت تخفیف غربت کی جانب سے کریانہ اسٹورز کو انسنٹیو دینے سے متعلق بریفنگ، کابینہ کمیٹی برائے توانائی کے فیصلوں کی توثیق بھی ایجنڈے میں شامل ہوگی۔