راجہ پرویز اشرف کا کہنا ہے کہ دیوالی کا تہوار ہمیں برائی کیخلاف حق و سچ کا ساتھ دینے کی یاد دلاتا ہے۔

رہنما پیپلز پارٹی اور سابق وزیراعظم راجہ پرویز اشرف نے روشنیوں کے تہوار دیوالی پر نیک تمناﺅں کا پیغام دیتے ہوئے کہاکہ دیوالی ہمیں بھائی چارے اور ایک دوسرے کی خوشی میں شرکت کا پیغام دیتی ہے۔

راجہ پرویز اشرف نے مزید کہاکہ دیوالی کے تہوار پر ہم دنیا بھر اور پاکستان کی ہندو برادری کو مبارکباد دیتے ہیں۔

واضح رہے کہ آج ہندو برادری دنیا بھر میں اپنا مذہبی تہوار دیوالی منا رہی ہے ، اس خوشی کے دن ہندو برادری پٹاخے پھوڑتی ہے اور اپنی رسومات کے مطابق عبادات کرتی ہے۔

پاکستان میں بھی ہندو برادری جوش و خروش سے دیوالی منا رہی ہے، جس پر وزیراعظم عمران خان نے پاکستان میں بسنے والے تمام ہندو شہریوں کو دیوالی کی مبارکباد دی ہے۔

دوسری جانب پی پی پی چیئرمین بلاول بھٹو زرداری نے بھی دیوالی پر جاری کردہ اپنے پیغام میں پاکستان سمیت دنیا بھر میں آباد ہندو برادری کو مبارکباد دی اور نیک خواہشات کا اظہار کیا۔

انہوں نے کہاکہ دیوالی کا تہوار برائی پر اچھائی کی فتح کی علامت ہے ، برائی کتنی ہی طاقتور کیوں نہ ہو، اٹل ارادے اور جہدِ مسلسل کے ہاتھوں شکست ہی اس کا مقدر ہے۔

بلاول بھٹو نے کہاکہ ملک میں اندھیروں، ناانصافیوں اور عدم مساوات کے خلاف لڑنا ہی پی پی پی کا فلسفہ ہے، قائدِ عوام، شہید محترمہ بینظیر بھٹو اور سابق صدر آصف زرداری نے اقلیتی برادری کی بہبود کے لئے اقدام اٹھائے۔

پی پی پی چیئرمین نے کہاکہ پاکستان پیپلز پارٹی کی آئندہ حکومت ملک میں اقلیتوں کی ترقی، ان کے حقوق کے تحفظ کے لئے مزید اقدام اٹھائے گی۔

بلاول بھٹو زرداری کا کہنا ہےکہ پی پی ملک میں بین المذاہب ہم آہنگی کو فروغ دینے کےلئے بھی اقدام اٹھائے گی۔

انہوں نےاپنے پیغام میں مزہد کہاکہ ہندو برادری آج دیوالی پر پاکستان کی سلامتی اور خوشحالی کے لئے دعائیں مانگیں۔

ذرائع کے مطابق  پاکستان مسلم لیگ (ن) کے صدر اور قائد حزب اختلاف شہبازشریف نے بھی روشنیوں کے تہوار دیوالی پر نیک تمناﺅں کا پیغام دیتے ہوئے کہاکہ ہندو برادری پاکستانی متنوع معاشرے کا ایک قابل فخر حصہ ہیں۔

انہوں نے مزید کہاکہ پاکستانی ہندو برادری کا ملک کی تعمیر، ترقی اور خوش حالی میں اہم کردار ہے، ہندوبرادری کے اس اہم تہوار کی خوشیوں پر اپنی خوشی کا اظہار کرتے ہیں۔