پی ڈی ایم کے ترجمان حافظ حمد اللہ نے کہا ہے کہ غریب عوام کو مہنگائی کے ذریعے رگڑے پہ رگڑے دئیے جارہے ہیں۔

حافظ حمداللہ نے اپنے جاری کردہ بیان میں کہا کہ چینی مافیا، آٹا مافیا، دوائی مافیا، پٹرول مافیا کی حکومت ملک اور قوم پر ساڑھے 3 سال سے مسلط ہے، پاکستان پر مسلط مافیاں کے توسط سے مہنگائی کے ذریعے عوام کا خون چوسا جارہا ہے۔

  انہوں نے کہا کہ ہرطرف مہنگائی کا راج ہے اور پیسہ بڑے مافیاز کے جیبوں اور تجوریوں میں جارہا ہے، جس تیز رفتاری سے مہنگائی میں اضافہ ہو رہا ہے، سوال یہ ہے کہ عوام کی آمدنی میں کیوں اضافہ نہیں ہو رہا؟

حافظ حمد اللہ کا کہنا تھا کہ غریب عوام کو مہنگائی کے ذریعے رگڑے پہ رگڑے دئیے جارہے ہیں، عوام پوچھ رہی ہے کہ ہم سے کہ کس چیزکا انتقام لیا جا رہا ہے؟

انہوں نے کہا کہ وزیر اعظم صاحب آپ کے وزراء کی فوج ظفر موج قومی خزانے پر بوجھ کیوں بنی ہوئی ہے؟ نا اہل حکمران استعفیٰ کیوں نہیں دیتے؟ یہ قوم کے لئے بہت بڑار یلیف ہوگا۔

پی ڈی ایم کے ترجمان کا کہنا تھا کہ عوام نے اگر مہنگائی کے طوفان اور تبدیلی خان سے اپنی حالت کو بدلنا ہے جان چھڑانا ہے تو سڑکوں پر نکلنا ہوگا، 17 نومبر پی ڈی ایم 13 نومبر کراچی، کوئٹہ اور 20 نومبر کو پشاور میں مہنگائی کے خلاف مہنگائی مارچ کرے گی عوام سے مہنگائی مارچ میں شرکت کی اپیل ہے۔

پی ڈی ایم کے ترجمان حافظ حمد اللہ نے مزید کہا کہ پی ڈی ایم غریبوں کی امید اورسہارا ہے، فیصلے کا وقت آچکا ہے، عوام نے دو میں سے ایک کا فیصلہ کرنا ہے، عمران خان بچاناہے، یا اپنے آپ اور پاکستان بچانا ہے۔