صوبائی وزیر صنعت و تجارت میاں اسلم اقبال نے کہا ہے کہ پنجاب حکومت 25 نوجوان سرمایہ کاروں کو دبئی ایکسپو میں شرکت کیلئے بھجوا رہی ہے۔

میاں اسلم اقبال کی زیرِ صدارت صوبائی اسٹئرنگ کمیٹی کا 9 واں اجلاس ہوا، پنجاب سرمایہ کاری بورڈ کے کمیٹی روم منعقدہ اجلاس میں پنجاب حکومت کی دوبئی ایکسپو میں شرکت اور بعض مالیاتی اقدامات کی منظوری دی گئی۔

سی ای او پنجاب سرمایہ کاری بورڈ ڈاکٹر ارفع اقبال نے دبئی سے وڈیو لنک کے ذریعے پنجاب حکومت کے مختلف محکموں کی شرکت سے آگاہ کیا، صوبائی وزیر نے دبئی ایکسپو میں پنجاب حکومت کی شرکت کے حوالے سے پنجاب سرمایہ کاری بورڈ کی کاوشوں کو سراہا۔

صوبائی وزیر صنعت و تجارت میاں اسلم اقبال کا کہنا تھا کہ پنجاب حکومت نے دوبئی ایکسپو میں عالمی سرمایہ کاروں کو راغب کرنے کے لئے خصوصی مہم پنجاب ایز کا باقاعدہ آغاز کردیا، مختلف محکموں کی طرف سے پنجاب میں سرمایہ کاری کے مواقع اجاگر کرنے کے لئے سیمنارز اور عوامی مباحثے کامیابی سے جاری ہیں۔

انہوں نے کہا کہ دوبئی ایکسپو میں دستاویزی فلموں، سیمنارز اور دلچسپ تبصروں کے ذریعے پنجاب کے مختلف رنگ اجاگر کئے جارہے ہیں، ان پروگراموں میں روزانہ ہزاروں شرکا حصہ لے رہے ہیں، وزیر اعلیٰ پنجاب دوبئی ایکسپو انٹرنیشنل بزنس کانفرنس کے مہمان خصوصی ہوں گے۔

میاں اسلم اقبال کا کہنا تھا کہ دبئی میں جاری بین الاقوامی ایکسپو پنجاب میں نئی سرمایہ کاری کے حوالے سے سنگ میل ثابت ہوگی، دبئی ایکسپو میں 14 سے 28 نومبر تک اسٹارٹ آپس اپنی سرگرمیاں جاری رکھیں گے، پنجاب حکومت 25 نوجوان سرمایہ کاروں کو دبئی ایکسپو میں شرکت کیلئے بھجوا رہی ہے۔

اس موقع پر سی ای او پنجاب سرمایہ کاری بورڈ ڈاکٹر ارفع اقبال کا کہنا تھا کہ دبئی ایکسپو میں اب تک 15 سیمنارز کا انعقاد کیا گیا ہے، پنجاب حکومت کے زیرِ اہتمام منعقدہ ایونٹس میں شرکاء بڑی تعداد میں حصہ لے رہے ہیں۔

سربراہ مانیٹرنگ یونٹ فضیل آصف، پنجاب سرمایہ کاری بورڈ کے ڈائریکٹرز نے بھی اجلاس میں شرکت کی جبکہ ایڈیشنل سیکرٹری کامرس اور اسٹیرنگ کمیٹی کے دیگر ممبران وڈیو لنک کے ذریعے اجلاس میں شریک ہوئے۔