ثانوی تعلیمی بورڈ نے امتحانی فیسوں میں کمی کا اعلان کر دیا ہے۔

تفصیلات کے مطابق سندھ  میں طلبہ، والدین اور اسکول مالکان کی جانب سے مطالبے کے بعد چیئرمین بورڈ سید شرف علی شاہ نے امتحانی فیسوں میں کمی کا اعلان کر دیا ہے۔

ثانوی تعلیمی بورڈ کے چیئرمین سید شرف علی شاہ نے کہا کہ اس قدم کا مقصد یہ ہے کہ طلبہ اور والدین آسانی کے ساتھ امتحانی فیسیں ادا کر سکیں اور انھیں تعلیمی اخراجات پورا کرنے کے لیے کسی مشکل کا سامنا نہ ہو۔

سید شرف علی شاہ  کا مزید کہنا تھا کہ ان حالات میں اسکول مالکان بھی طلبہ اور والدین کو آسانی فراہم کرنے کے لیے فیسوں میں کمی کرنے پر نظرثانی کریں یا طلبہ و طالبات کو کچھ حد تک ریلیف فراہم کریں تاکہ ان کا کسی بھی طرح کا تعلیمی نقصان نہ ہو۔

یاد رہے اس سے قبل صوبہ سندھ اور خصوصاً کراچی میں کووِڈ 19 کے باعث بحران کی وجہ سے والدین، طلبہ و طالبات، بورڈ سے الحاق شدہ اسکول مالکان اور اسکولز ایسوسی ایشنز کی طرف سے یہ مطالبہ سامنے آ رہا تھا کہ ثانوی تعلیمی بورڈ سال 2022 کی امتحانی فیسوں میں کمی کا اعلان کریں تاکہ طلبہ و طالبات اور والدین کو کچھ ریلیف مل سکے۔

مطالبے کے بعد ثانوی تعلیمی بورڈ کے چیئرمین سید شرف علی شاہ نے ان مشکل حالات میں والدین، اسکول مالکان اور اسکولز ایسوسی ایشنز کی سہولت کو مدنظر رکھتے ہوئے سال 2022 کی امتحانی فیسوں میں کمی کا اعلان کیا تھا ۔