سینیٹر کامل علی آغا کا کہنا ہے کہ پارٹی کی پارلیمانی قیادت کی مشاورت کے بعد حکومت کی حمایت جاری رکھنےکا فیصلہ کیا ہے۔

مشترکہ اجلاس سے متعلق مسلم لیگ ق کےسینیٹر کامل علی آغا نے میڈیا سے گفتگوکرتے ہوئے کہا کہ گزشتہ روز ہمارے وفاقی وزراء کی وزیراعظم سے ملاقات ہوئی اوراپنے تحفظات سے عمران خان کو اگاہ کیا۔

سینیٹر کامل علی آغا نے کہا کہ وزیراعظم نے تمام معاملات حل کرنے کی یقین دہانی کروائی ہے۔ وزیراعظم سےملاقات کے بعد پارٹی کے وفاقی وزراء کی چوہدری پرویز الٰہی سے ملاقات کی۔

مسلم لیگ ق کے رہنما کا کہنا ہے کہ عوامی ایشوزپرتسلسل کےساتھ رابطے رہنے چاہییں۔

صحافی نےسوال کیا کہ کیا ای وی ایم اور انتخابی اصلاحات پرق لیگ کو حکومت نے مطمئن کرلیا ہے؟

کامل علی آغا نے جواب دیتے ہوئے کہا کہ بریفنگ کے دوران وزیراعظم نے ہمارے تحفظات دور کرنے کی یقین دہانی کروائی ہے۔

صحافی نے مزید سوال کیا کہ طارق بشیر چیمہ نے حکومت کو بلز پر ووٹ نا دینے کا اعلان کیا تھا۔

مسلم لیگ ق کے رہنما نے کہا کہ چیمہ صاحب درست فرماتے ہے ان کے تحفظات ہیں، میرے بھی تحفظات تھے۔ مگر پارٹی نے جب فیصلہ کرلیا تو ہم سب ووٹ دینے کے پابند ہوں گے۔ ابھی تک ہمارے مطالبات پر 20 فیصد بھی عملدرآمد نہیں ہوا۔

ان کا کہنا ہے کہ ہم حکومت کو ہرمعاملے پر مشاورت کا کہتے ہیں۔ حکومت کو چاہیئے کہ وہ سب کو اعتماد میں لیں۔

ق لیگ کے مطالبات وفاق تسلیم نہیں کر رہی یا بزدار صاحب؟ کے سوال پر کامل علی آغا نے جواب دیا کہ ق لیگ کو ذیادہ تحفظات پنجاب حکومت سے ہیں۔ پنجاب میں ہمارے تحفظات مزید بڑھ رہے ہیں۔

ان کا مذید کہنا تھا کہ ق لیگ اتحادی ہونے کا ثبوت دے رہی ہے مگر حکومت نہیں دے رہی۔

حکومت کی پانچ سالہ مدت پوری کرنے کے سوال پرسینیٹر کامل علی آغا نے کہا کہ ہماری توخواہش ہے کہ حکومت پانچ سال مکمل کرے۔