اپوزیشن نے حکومتی قانون سازی روکنے کی منصوبہ بندی کرلی۔

ذرائع کے مطابق مشترکہ اجلاس شروع ہوتے ہی اپوزیشن کے احتجاج کا پلان ہے، شور شرابہ اور ہنگامہ آرائی کےلیے بھی اراکین کو ہدایات جاری کر دی گئیں۔

اجلاس میں ہر بل پر ووٹنگ کو چیلنج کیا جائے گا،حکومت کو قانون سازی بلڈوز نہیں کرنے دی جائے گی۔

 بلڈوز کرنے کی صورت میں اسپیکر ڈائس کے احتجاج کا بھی منصوبہ تیار کر لیا گیا۔

ذرائع کے مطابق وزیراعظم عمران خان کے آنے پر ان کا گھیراؤ بھی پلان میں شامل ہے۔

حکومت کو مختلف بلز منظور کروانے کےلیے ایوان میں موجود اراکین کی سادہ اکثریت درکار ہوگی۔

حکمراں جماعت اور اتحادیوں کے اراکین کی تعداد 222 اور اپوزیشن جماعتوں کے اراکین کی تعداد 219 ہے۔

حکومت کا آج اجلاس میں 20 قوانین منظور کرانے کا فیصلہ

گزشتہ روز وزیراعظم عمران خان سے قانونی ٹیم کی ملاقات ہوئی۔

وزیراعظم نے وزیر قانون فروغ نسیم، بیرسٹر علی ظفر اور اٹارنی جنرل خالد جاوید خان سے ملاقات کی۔

اس ملاقات میں پارلیمنٹ کے مشترکہ اجلاس میں پیش ہونے والے بلز پر تفصیلی مشاورت کی گئی۔

 اٹارنی جنرل نے وزیراعظم عمران خان کو اسلام آباد ہائی کورٹ میں سابق جج رانا شمیم کیس پر بھی بریفنگ دی۔

ملاقات  کے بعد سینیٹر علی ظفر نے گفتگو کرتے ہوئے کہاکہ 20 سے زائد قوانین مشترکہ اجلاس سے منظور کرائیں گے۔

 انہوں نے بتایا کہ کوشش کریں گے بحث کرا کے اتفاق رائے سے بل منظور کرائیں، بہت سے بل پہلے ہی قائمہ کمیٹیوں سے منظور ہو چکے ہیں۔

بیرسٹر علی ظفر نے مزید بتایاکہ کوشش کریں گے ایک ہی دن میں قانونی سازی نمٹا دیں

حکومت اور اپوزیشن آج پارلیمنٹ میں آمنے سامنے ہونگے 

آج پارلیمنٹ کے مشترکہ اجلاس کی صدارت اسپیکر قومی اسمبلی اسد قیصر کرینگے، اجلاس دن 12 بجے شروع ہوگا۔

 آج ہونے والے پارلیمنٹ کے مشترکہ اجلاس کا 60 نکاتی ایجنڈا بھی جاری کردیا گیا، حکومت نے آج 20 سے زائد بل ایک ساتھ منظورکرانے کی تیاری کرلی۔

حکومت انتخابی اصلاحات، الیکٹرانک ووٹنگ مشین، سمندر پار پاکستانیوں کو ووٹ کا حق دینے اور کلبھوشن یادیو سے متعلق بل سمیت 20 سے زائد بل منظور کرانے کی کوشش کرے گی جب کہ اپوزیشن بھی ڈٹ کر مقابلہ کرے گی۔

ایجنڈے کے مطابق اجلاس میں انتخابی اصلاحات سے متعلق دو بل پیش کیے جائیں گے۔

الیکشن ایکٹ ترمیمی بلز ای وی ایم اور سمندر پار پاکستانیوں کے انٹرنیٹ ووٹنگ سے متعلق ہیں۔ الیکشن ایکٹ ترمیمی بل میں ووٹرز فہرستوں کا اختیار نادرا کو دینے کی ترمیم شامل ہے۔

کلبھوشن کو اپیل کا حق دینے سے متعلق بین الاقوامی عدالت انصاف نظرثانی بل ایجنڈے کا حصہ ہے، انسداد جنسی زیادتی تحقیقات اور ٹرائل کا بل بھی ایجنڈے میں شامل ہے جو خصوصی تحقیقاتی ٹیمز اور عدالتوں کی تشکیل سے متعلق ہے۔

حیدرآباد انسٹیٹیوٹ فار ٹیکنیکل اینڈ مینجمنٹ سائنسز کے قیام، خواتین اور بچوں کے خلاف جنسی زیادتی کی روک تھام سے متعلق کریمنل لاء ترمیمی بل اور بچوں کی جسمانی سزا کے تدارک کا بل بھی اجلاس میں پیش کیا جائے گا۔

مردم شماری سے متعلق تحفظات پر مشترکہ مفادات کونسل کے فیصلے کے خلاف سندھ حکومت کا ریفرنس بھی ایجنڈے کا حصہ ہے۔

واضح رہے کہ صدر مملکت عارف علوی نے پارلیمنٹ کا مشترکہ اجلاس آج (بدھ) دوپہر 12 بجے طلب کیا تھا۔