ڈی پی او محمد ظفر بزدار نے کہا ہے کہ اسکولوں میں ٹریفک سیفٹی کی آگاہی کے لئے سیمینار منعقد کیے جائیں گے۔

ڈسٹرکٹ پولیس آفیسر محمد ظفر بزدار کی زیرِ صدارت ٹریفک سیفٹی کے سلسلے میں اہم اجلاس ہوا جس میں ٹریفک اسٹاف اور ڈی ایس پی صدر سرکل نے بھی شرکت کی جبکہ دیگر سرکل افسران ضلع نے بذریعہ ویڈیو لنک اجلاس میں شریک ہوئے۔

اجلاس میں ڈی پی او محمد ظفر بزدار نے خطاب کرتے ہوئے کہا کہ اسکولوں کے اوقات کار میں ڈسٹرکٹ ٹریفک آفیسر، ایس ڈی پی اوز خود فیلڈ میں آئیں اور سپرویژن کریں، انہوں نے اسکولوں کی جانب سے روڈ کراسنگ اسسٹنٹس کی دستیابی یقینی بنانے کی ہدایت کی۔

ان کا کہنا تھا کہ سروس روڈز پر قائم غیر قانونی تجاوزات کیخلاف انتظامیہ کے ساتھ مل کر کارروائی کی جائے، اسکولوں اور کالجوں میں ٹریفک سیفٹی کی آگاہی کے لئے سیمینار منعقد کیے جائیں گے۔

انہوں نے کہا کہ ٹریفک پولیس، موٹر وہیکل ایگزامینر کے اشتراک سے ہیوی لاجسٹک اور پبلک ٹرانسپورٹ کی فٹنس چیکنگ کو یقینی بنائیں۔

ڈسٹرکٹ پولیس آفیسر محمد ظفر بزدار نے مزید کہا کہ اسموگ کی وجہ سے ممکنہ ٹریفک حادثات سے بچاؤ کیلئے خصوصا سلو موونگ وہیکلز پر ریفلیکٹرز لگوائے جائیں جبکہ بغیر لائسنس اور کم عمر ڈرائیوروں کے خلاف کریک ڈاون تیز کیا جائے، انسانی جان کی حفاظت یقینی بنانا، سروس بھی ہے ثواب بھی ہے۔