پنجاب میں کھاد کی سپلائی کی مانیٹرنگ کیلئے آن لائن پورٹل فوری طور پر فعال کرنے کا فیصلہ کیا گیا ہے۔

چیف سیکرٹری پنجاب کامران علی افضل اور وفاقی سیکرٹری انڈسٹریز جواد رفیق ملک کی زیرِ صدارت سول سیکرٹریٹ میں اجلاس منعقد ہوا جس میں چیف سیکرٹری کا کہنا تھا کہ فرٹیلائزر کمپنیوں سے ڈیلرز کو کھاد کی سپلائی کی مکمل نگرانی کی جائے گی، نا جائز منافع خوری کرنے والوں کی دکانوں کو سر بمہر کر دیا جائے۔

اجلاس کو بریفنگ دی گئی کہ اسپیشل برانچ کی رپورٹ کے مطابق ذخیرہ اندوزں کے خلاف کریک ڈاؤن سے صوبہ میں کھاد کی قیمت میں کمی آئی ہے۔

چیف سیکرٹری پنجاب کامران علی افضل اور وفاقی سیکرٹری انڈسٹریزجواد رفیق ملک نے کھاد کی ذخیرہ اندوزی کی روک تھام اور سپلائی کی مانیٹرنگ کیلئے پنجاب حکومت نے آن لائن پورٹل فوری طور پر فعال کرنے کا فیصلہ کیا ہے اور اس سلسلے میں تمام متعلقہ محکموں اور ڈویژنل کمشنرز کو ہدایات جاری کر دی ہیں۔

اجلاس میں کھاد کے کاروبار میں مڈل مین کا کردار ادا کرنے والے سرکاری ملازمین کے خلاف کارروائی کا فیصلہ بھی کیا گیا۔

اجلاس سے خطاب کرتے ہوئے چیف سیکرٹری نے کہا کہ پورٹل پر فرٹیلائزرکمپنیوں سے ڈیلرز کو کھاد کی سپلائی کی مکمل نگرانی کی جائے گی اور ہر ضلع میں موجود کھاد کے سٹاک سے متعلق معلومات بھی حاصل کی جا سکے گی۔

انہوں نے چیئرمین پی آئی ٹی بی کو ہدایت کی کہ تمام ڈویژنل کمشنرز اورڈپٹی کمشنرزکو پورٹل پر فوری رسائی دے دی جائے۔

 چیف سیکرٹری نے کہا کہ کھاد کی قیمتوں اور گرانفروشی کیخلاف شکایت درج کروانے کیلئے رابطہ نمبرسے متعلق بینرز نمایاں آویزاں کرائے جائیں۔

انہوں نے ہدایت کی کہ نا جائز منافع خوری میں ملوث ڈیلرز کی دکانوں کو سر بمہر کر دیا جائے اور سرحدی اضلاع میں کھاد کی نقل و حمل پر کڑی نظر رکھی جائے۔

چیف سیکرٹری نے کھاد کی ذخیرہ اندوزی کے خلاف انتظامی اقدامات سے متعلق رپورٹ بھی ایک روز میں طلب کر لی۔

وفاقی سیکرٹری انڈسٹریز نے کہا کہ کھاد کی مقررہ قیمت پر دستیابی یقینی بنانے کیلئے تمام کمشنرز اور ڈپٹی کمشنرز فیلڈ میں نکلیں، اگلے دو روز کے اندر کھاد کی قیمتوں میں واضح کمی نظر آنی چاہئے۔

انہوں نے کہا کہ یوریا کھاد کی 1768روپے فی بوری سے زائد قیمت پر فروخت کی کسی صورت اجازت نہیں دی جا سکتی۔

اجلاس کو بریفنگ میں بتایا گیا کہ سپیشل برانچ کی رپورٹ  کے مطابق ذخیرہ اندوزں کیخلاف کریک ڈاؤن سے صوبہ میں کھاد کی قیمت میں کمی آئی ہے۔

ایڈیشنل چیف سیکرٹری، چیئرمین پی آئی ٹی بی، ایڈیشنل سیکرٹری انڈسٹریز ڈویژن اور متعلقہ افسران نے اجلاس میں شرکت کی جبکہ تمام ڈویژنل کمشنرز ویڈیو لنک کے ذریعے شریک ہوئے۔