اسپیکر قومی اسمبلی اسد قیصر نے کہا ہے کہ تاجر برادری ملک کی اقتصادی ترقی کے لیے ریڑھ کی ہڈی کی حیثیت رکھتی ہے۔

 اسد قیصر سے اسلام آباد چیمبر آف کامرس اینڈ انڈسٹری کے صدر محمد شکیل منیر نے ملاقات کی، ملاقات میں ملک کی مجموعی معاشی صورتحال، تاجر برادری اور صنعت کاروں کو در پیش مسائل پر تبادلہ خیال ہوا۔

اسپیکر قومی اسمبلی کا کہنا تھا کہ تاجر برادری ملک کی اقتصادی ترقی کے لیے ریڑھ کی ہڈی کی حیثیت رکھتی ہے، تاجروں کو در پیش مسائل کے حل کے لیے ہر ممکن اقدامات اٹھائے جا رہے ہیں، تاجر اور صنعت کار برادری ملک کی اقتصادی ترقی اور سرمایہ کاری کے فروغ کے لیے اپنا کردار ادا کرے۔

اسد قیصر نے کہا کہ افغانستان اور وسطی ایشیائی ریاستوں اور دیگر ہمسایہ ممالک کے مابین تجارت کا فروع خطہ کی خوشحالی کے کیے انتہائی اہمیت کا حامل ہے، قومی اسمبلی میں پاک افغان پارلیمانی فرینڈ شپ گروپ کی ایگزیکٹو کمیٹی دونوں ممالک میں تجارت کے فروغ کے لیے کام کر رہی ہے۔

ان کا کہنا تھا کہ علاقائی تجارت میں اضافے کے لیے ان ممالک کے متعلقہ ایوان ہائے صنعت و تجارت میں رابطوں میں اضافہ ضروری ہے، پاکستان اور افعانستان میں تجارت کے فروغ کے لیے دونوں ممالک اور سرمایہ کاروں کی مشترکہ کانفرنس کا انعقاد کیا جائے۔

ملاقات میں صدر اسلام آباد چیمبر آف کامرس محمد شکیل منیر نے اسپیکر قومی اسمبلی کو تاجر برادری کو درپیش مسائل سے آگاہ کیا، ان کا کہنا تھا کہ اسلام آباد میں نئی انڈسٹریل اسٹیٹ کا قیام ضروری ہے، حکومت نئی انڈسٹریل اسٹیٹ کے قیام کے لیے اقدامات اٹھائے۔

ان کا کہنا تھا کہ موجودہ حکومت کی سرمایہ کار دوست پالیسیاں قابلِ ستائش ہیں، صدر چیمبر آف کامرس نے اسپیکر قومی اسمبلی کو ایوان ہائے صنعت و تجارت اسلام آباد کا دورہ کرنے کی دعوت دی۔

چیمبر آف کامرس اینڈ انڈسٹری کے صدر محمد شکیل منیر نے پاک افغان تجارت میں اضافے کے لیے اسپیکر قومی اسمبلی اسد قیصر کے کردار کو سراہا۔

اسپیکر قومی اسمبلی نے صدر اسلام آباد چیمبر آف کامرس کو تاجر برادری کو در پیش مسائل کے حل کے لیے اپنے ہر ممکن تعاون کی یقین دبانی کروائی۔