ترجمان پنجاب حکومت حسان خاور کا کہنا ہے کہ آج کراچی میں پی ڈی ایم کا شو ایک بار پھر ناکام رہے گا۔

انہوں نے اپنے بیان میں کہا ہے کہ پی ڈی ایم سیاسی اتحاد نہیں، کرپٹ ٹولے کی پناہ گاہ بن چکی ہے، ”کرپشن کے مگر مچھ“ پی ڈی ایم کی چھتری تلے جمع ہیں۔

حسان خاور نے کہا کہ اپوزیشن کے چلے ہوئے کارتوس ہر محاذ پر ناکام ہو چکے ہیں، مولانا فضل الرحمان، شہبازشریف اور بلاول قوم کو گمراہ نہیں کر سکتے، یہ تینوں سیاست دان ایک دوسرے کو دھوکہ دے رہے ہیں۔

ترجمان پنجاب حکومت کا کہنا ہے کہ عوام انہیں 2018 کے عام انتخابات میں مسترد کر چکی ہے، قوم ملک کو لوٹنے والوں کے جھانسے میں نہیں آئے گی، آج کراچی میں پی ڈی ایم کا شو ایک بار پھر ناکام رہے گا۔

انہوں نے کہا کہ عوام کی ترقی اور خوشحالی کی راہ میں کسی کو رکاوٹ نہیں ڈالنے دیں گے، پی ڈی ایم کے پاس اب بیچنے کیلئے کوئی منجن باقی نہیں، اس ٹولے کی حالت قابل رحم ہے۔

حسان خاور نے مزید کہا کہ بند گلی میں پھنسی ہوئی اپوزیشن کو اب فیس سیونگ بھی نہیں ملے گی، یہ وہ عناصر ہیں جنہوں نے اپنے دور حکومت میں پاکستان کی بنیادوں کو کھوکھلا کیا، رسوائی اور شرمندگی ان کا مقدر ہے اور رہے گی۔

واضح رہے کہ پی ڈی ایم بڑھتی ہوئی مہنگائی پر آج حکومت کے خلاف کراچی کے علاقے صدر ریگل چوک پر احتجاجی مظاہرہ کرے گی۔

تفصیلات کے مطابق پی ڈی ایم کے سربراہ مولانا فضل الرحمان احتجاجی مظاہرے کی قیادت کریں گے۔ احتجاجی مظاہرے میں پاکستان ڈیموکریٹک موومنٹ میں شامل مسلم لیگ ن سمیت دیگر جماعتوں کے قائدین اور کارکنان بھی شریک ہوں گے۔

ٹریفک پولیس کی جانب سے ٹریفک کی روانی بحال رکھنے کے انتظامات کیےگئے ہیں۔ احتجاجی مظاہرے کے دوران ریگل چوک کے اطراف آنے اور جانے والی سڑکوں کو بند کرکے ٹریفک کو متبادل راستوں پر موڑ دیا جائے گا۔

پی ڈی ایم کے سربراہ مولانا فضل الرحمان گزشتہ روز کراچی پہنچے تھے، جے یوآئی سندھ کے سیکرٹری جنرل علامہ راشد سومرو، اسلم غوری سمیت پارٹی رہنماؤں نے ان کا استقبال کیا تھا۔

جے یو آئی سندھ کے مطابق مولانا فضل الرحمان کراچی میں دو روزہ قیام کے دوران پارٹی رہنماؤں سے ملاقاتیں کریں گے۔