صوبائی وزیر صحت ڈاکٹر یاسمین راشد نے کہا ہے کہ پنجاب کے سرکاری ہسپتالوں میں مریضوں کا بہتر علاج اولین ترجیحات میں شامل ہے۔

 ڈاکٹر یاسمین راشد نے گنگارام ہسپتال کا دورہ کیا، وائس چانسلر فاطمہ جناح میڈیکل یونیورسٹی پروفیسر ڈاکٹر عامر زمان خان، ڈاکٹر رضوان، ڈاکٹر کامران و دیگر فیکلٹی ممبران ان کے ہمراہ تھے۔

وزیر صحت ڈاکٹر یاسمین راشد نے گنگارام ہسپتال میں ڈینگی وارڈز کا دورہ کیا اور اسکلز لیب کی سائٹ کا جائزہ لیا، وائس چانسلر پروفیسر ڈاکٹر عامر زمان خان نے ڈاکٹر یاسمین کو گنگارام ہسپتال میں ڈینگی کے مریضوں کو فراہم کی جانے والی طبی سہولیات کی تفصیلات سے آگاہ کیا۔

ڈاکٹر یاسمین راشد نے اظہار خیال کرتے ہوئے کہا کہ یو این ایف پی اے گنگارام ہسپتال میں اسکلز لیب، کمپیوٹر آئی ٹی لیب، کانفرنس روم اور لائبریری کے قیام میں مالی معاونت کرے گی، گنگارام ہسپتال میں ڈینگی کے مریضوں کا بہترعلاج کیا جارہا ہے۔

ان کا کہنا تھا کہ اسکلز لیب میں ڈاکٹرز کی جدید تقاضوں کے مطابق تربیت کروائی جائے گی، نرسنگ کالج اور مڈوائفری کالج کی طالبات جدید اسکلز لیب سے جدید تربیت حاصل کریں گی، گنگارام ہسپتال میں صفائی ستھرائی کے انتظامات تسلی بخش ہیں۔

ڈاکٹر یاسمین راشد نے کہا کہ گنگارام ہسپتال کے گائنی وارڈ میں مریضوں کو بہتر سہولیات فراہم کی جارہی ہیں، پنجاب کے سرکاری ہسپتالوں میں مریضوں کا بہترعلاج اولین ترجیحات میں شامل ہے۔

صوبائی وزیر صحت ڈاکٹر یاسمین راشد کا مزید کہنا تھا کہ وزیر اعظم عمران خان کے ویژن کے مطابق پنجاب کی عوام کو صحت کے شعبہ میں بہتر سہولیات فراہم کرنے کیلئے کوشاں ہیں۔