وزیرِ اعظم عمران خان نے کہا ہے کہ بچوں اور نوجوانوں میں سیرت طیبہ کی تعلیمات عام کرنے کیلئے خصوصی توجہ دی جائے گی۔

عمران خان کی زیرِ صدارت رحمت العالمین اتھارٹی پر پیش رفت کا جائزہ اجلاس ہوا جس میں میں علماء کرام سے مشاورت کے طریقہ کار، بین الاقوامی سطح پر اتھارٹی کے مجوزہ اقدامات پر گفتگو کی  گئی۔

اجلاس میں ایڈوائزی کونسل کے کردار، سکولوں و کالجوں میں طلباء میں سیرت کے شعور کیلئے اقدامات پر باتچیت کی گئی جبکہ اجلاس میں وزیر اعظم کو  جامع میڈیا پلان پر بھی بریفنگ دی گئی۔

اجلاس میں عمران خان کو بریفنگ دیتے ہوئے کہا گیا کہ  معیاری نشری مواد کے ذریعے بچوں اور نوجوانوں کو سیرت طیبہ کو عملی زندگی میں اپنانے کی  ترغیب دی جائے گی۔

بریفنگ دیتے ہوئے مزید کہا گیا کہ  نشری مواد میں سیرت کے اخلاقی پہلوؤں پر توجہ مرکوز کرکے معاشرتی برائیوں کے تدارک میں معاونت حاصل ہوگی۔

اجلاس کی صدارت کرتے ہوئے وزیرِ اعظم عمران خان نے اتھارٹی سے متعلق تمام اقدامات پر تیزی سے عمل کرنے کی ہدایات جاری کیں۔

وزیرِ اعظم عمران خان نے کہا کہ رحمت اللعالمین اتھارٹی کا مقصد معاشرے کی اخلاقی برائیوں کا سیرتِ طیبہ کی روشنی میں تدارک ہے، بچوں اور نوجوانوں میں سیرت طیبہ کی تعلیمات عام کرنے کیلئے خصوصی توجہ دی جائے گی۔

اجلاس  میں معاونِ خصوصی ڈاکٹر شہباز گِل، پروفیسر اعجاز اکرم، ڈاکٹر انیس احمد، ڈاکٹر خالد مسعود، ڈاکٹر عارف بٹ نے شرکت کی جبکہ وفاقی وزیر برائے تعلیم و پیشہ ورانہ تربیت شفقت محمود اور پروفیسر ڈاکٹر عطاء الرحمن نے وڈیو لنک کے ذریعے شرکت کی ۔