وزیرِ اعظم عمران خان سے وفاقی وزیر سمندری امور سید علی حیدر زیدی اور معاونِ خصوصی محمود مولوی کی ملاقات ہوئی۔

ملاقات میں بلیو اکانومی کے ذریعے خطے کی اقتصادی خوشحالی میں پاکستان کی بڑھتی ہوئی اہمیت پر گفتگو کی گئی جبکہ وزرات کے اقدامات کی بدولت ملکی زرِ مبادلہ میں وزیرِ اعظم کو اضافے پر بریفنگ دی گئی۔

وزارتِ سمندری امور کی ریسٹرکچرنگ اور فشریز کے شعبے میں بڑے پیمانے پراصلاحات پر بھی بریفنگ دی گئی۔

ملاقات میں وزیرِ اعظم نے وزارت کے اقدامات کو سراہتے ہوئے اقدامات پر عملدرآمد کو تیز کرنے کی ہدایات جاری کیں۔

دوسری جانب وزیر اعظم عمران خان سے جنوبی ایشیائی علاقائی تعاون کی تنظیم (سارک) کے سیکرٹری جنرل ایسالا رووان ویراکون نے بھی ملاقات کی۔

ملاقات میں سارک کے سیکرٹری جنرل نے سیالکوٹ واقعے کی شدید مذمت کرتے ہوئے وزیراعظم سے پریانتھا کمارا کی موت پر تعزیت کا اظہار کیا۔

وزیراعظم نے سارک کے عمل کو مزید بہتر بنانے اور فروغ دینے کے لیے سارک کے سیکرٹری جنرل کی کوششوں کو سراہا جبکہ وزیراعظم پاکستان نے موسمیاتی تبدیلی، تعلیم، غربت کے خاتمے، توانائی کے انضمام اور صحت کے چیلنجز پر تعاون کو مضبوط بنانے پر بھی زور دیا۔

وزیر اعظم کا کہنا تھا کہ سیالکوٹ واقعے میں ملوث افراد کو انصاف کے کٹہرے میں لانے کے لیے تمام ضروری اقدامات اٹھائے گئے ہیں۔