عمران خان نے کہا ہے کہ بیرون ملک مقیم پاکستانی معالجین کو ملک میں بھاری سرمایہ کاری کرنی چاہیے۔

وزیراعظم عمران خان سے پاکستانی نژاد ڈاکٹروں کی ایسوسی ایشن آف نارتھ امریکہ کے وفد کی ملاقات ہوئی جس میں وزیر اعظم نے شمالی امریکہ کے صحت کے شعبے میں ایپنا کی خدمات کو سراہا۔

 ایپنا کے صدر ڈاکٹر رضوان خالد نے وزیر اعظم کو کورونا وبائی امراض کا مقابلہ کرنے میں ان کی حکومت کی نمایاں کامیابیوں پر سراہا اور بیرون ملک مقیم پاکستانیوں کو ووٹ کا حق دینے کے ساتھ ساتھ ان کی سہولت کے لیے پاور آف اٹارنی کے اجراء کے لیے آن لائن سسٹم قائم کرنے پر بھی وزیر اعظم کا شکریہ ادا کیا۔

وفد نے گفتگو کرتے ہوئے کہا کہ ایپنا پاکستان میں  خیراتی اور فلاحی منصوبوں میں بلکہ صحت کے شعبے میں موثر پالیسی سازی میں بھی اپنا حصہ ڈالیں گے،اس سلسلے میں صرف ایک سرکاری مدد اور سہولت کی ضرورت ہے۔

 اس موقع پر وزیراعظم عمران خان نے پاکستان کے ہیلتھ کیئر سیکٹر میں سرمایہ کاری کرنے کے خواہشمند تمام بیرون ملک مقیم ڈاکٹروں کی سہولت کے لیے بورڈ آف انویسٹمنٹ میں ایک وقف ڈیسک قائم کرنے کی ہدایت دی۔

وزیراعظم نے کہا کہ بیرون ملک مقیم پاکستانی معالجین کو پاکستان میں معیاری صحت کی دیکھ بھال کے نظام کی فراہمی کے لیے بھاری سرمایہ کاری کرنی چاہیے۔

وزیراعظم عمران خان کا کہنا تھا کہ متعلقہ حکام ایپنا کو وزیراعظم کی نیشنل ہیلتھ ٹاسک فورس میں مناسب نمائندگی دے کر اس شعبے میں ان کی گرانقدر مہارت سے استفادہ حاصل کریں۔

وزیراعظم عمران خان کا مزید کہان تھا کہ ایپنا پاکستان میں جدید ترین طبی سہولیات کی فراہمی کے لیے زیادہ سے زیادہ براہ راست غیر ملکی سرمایہ کاری کو راغب کرنے کے لیے اپنی طاقت کا استعمال کریں۔

ملاقات میں معاون خصوصی ڈاکٹر فیصل سلطان بھی شریک ہوئے۔