شیر شاہ میں نجی بینک کی عمارت میں دھماکے سے 17 افراد جاں بحق جب کہ متعدد زخمی ہوگئے۔

بول نیوز کے مطابق کراچی کے علاقے شیر شاہ میں پراچہ چوک کے قریب واقع ایک نجی بینک کی عمارت میں عین اس وقت دھماکا ہوا جب عملہ پیشہ وارانہ خدمات سرنجام دے رہا تھا۔ دھماکے کے وقت عوام کی بھی بڑی تعداد بھی موجود تھی۔

دھماکا اس قدر شدید تھا کہ ناصرف بینک کی دیواریں گر گئی بلکہ قریب واقع پیٹرول پمپ کو بھی کافی نقصان پہنچا، اس کے علاوہ اطراف کی عمارتوں کے بھی شیشے ٹوٹ گئے۔

یہ خبر بھی پڑھیں : نیو کراچی میں سلنڈر دھماکہ،2 افراد جاں بحق

 دھماکے کے بعد پولیس رینجرز اور امدادی کارکنوں کی بڑی تعداد موقع پر پہنچ گئی، زخمیوں کو سول اسپتال بے نظیر بھٹو ٹراما سینٹر منتقل کردیا گیا، جہاں انہیں طبی امداد فراہم کی جارہی ہے۔

طبی عملے نے 17  افراد کے جاں بحق ہونے کی تصدیق کردی ہے جب کہ کئی کی حالت تشویشناک بتائی جارہی ہے۔

یہ خبر بھی پڑھیں: کراچی میں فیکٹری کا بوائلر پھٹنے 8 افراد جاں بحق

پولیس کا کہنا ہے کہ بینک جس عمارت میں قائم ہے وہ نالے پر بنی ہے، دھماکا بھی نالے میں گیس بھر جانے سے ہوا ہے۔

نالے پر عمارت کے حوالے سے بینک کا موقف

نجی بینک کے ترجمان نے کہا ہے کہ بینک طویل عرصے یہاں قائم ہے، بینک کرائے پر ہے جس کی ہر ماہ ادائیگی کی جاتی ہے۔

ایک زخمی کی حالت تشویشناک

ٹراما سینٹر کے باہر میڈیا سے بات کرتے ہوئے صوبائی وزیر صحت ڈاکٹر عذرا پیچوہو نے کہا کہ اس واقعے میں اب تک 17 افراد جاں بحق ہوچکے ہیں، تمام لاشیں ٹراما سینٹر میں آئی ہیں ، واقعے میں 16 افراد زخمی ہوئے ہیں جن میں سے ایک کی حالت تشویشناک ہے۔

وزیراعلیٰ سندھ کا نوٹس

وزیراعلیٰ سندھ مراد علی شاہ نے شیر شاہ کے قریب دھماکے کا نوٹس لیتے ہوئے کمشنر کراچی کو انکوائری کرنے کا حکم دے دیا۔

وزیراعلیٰ سندھ کا کہنا تھا کہ انکوائری میں پولیس کا افسر شامل کیا جائے۔

وزیراعلیٰ سندھ نے سیکریٹری صحت کو سول اسپتال میں سہولیات کی فراہمی  جب کہ  انتظامیہ کو اسپتال اور جائے وقوعہ  پر پہنچ کر متاثرین کی ہر ممکن مدد کرنے کی بھی ہدایات کی۔

رکن قومی اسمبلی عالمگیر خان کے والد بھی جاں بحق

پراچہ چوک کے قریب ہونے والے دھماکے میں جاں بحق افراد میں تحریک انصاف کے رکن قومی اسمبلی عالمگیر خان کے والد دلاور خان بھی شامل ہیں، وہ دھماکے کے وقت جائے وقوعہ پر ہی موجود تھے۔

وزیراعظم کا شیرشاہ دھماکے پر اظہار افسوس

وزیراعظم عمران خان نے شیر شاہ دھماکے پر افسوس کا اظہار کرتے ہوئے سماجی رابطے کی ویب سائٹ پر اپنے ٹویٹ میں لکھا کہ میری دلی دعائیں اور تعزیت کراچی کے شیر شاہ پراچہ چوک پر ہونے والے دھماکوں کے متاثرین کے تمام خاندانوں کے ساتھ ہیں۔

My heartfelt prayers & condolences go to all the families of victims of the twin blasts at Sher Shah Paracha Chowk, Karachi. I am especially saddened to hear of the loss of our MNA Alamgir Khan’s father who also perished in the blast. May Allah give him strength to bear this loss

— Imran Khan (@ImranKhanPTI) December 18, 2021

انہوں نے کہا کہ مجھے خاص طور پر ہمارے ایم این اے عالمگیر خان کے والد کا سن کر بہت دکھ ہوا جو دھماکے میں شہید ہوگئے تھے۔

وزیراعظم عمران خان نے مزید کہا کہ  اللہ عالمگیر خان کو  یہ صدمہ برداشت کرنے کی توفیق عطا فرمائے۔

سیاسی رہنماؤں کا اظہار افسوس

چیئرمین پیپلز پارٹی بلاول بھٹو زرداری نے دھماکے میں قیمتی انسانی جانوں کے ضیاع پر اظہار افسوس کرتے ہوئے متعلقہ حکام کو ہدایت کی ہے کہ دھماکے کی نوعیت اور سدباب کا تعین کیا جائے، دھماکے میں زخمی ہونے والے تمام افراد کے فی الفور علاج معالجے کو یقینی بنایا جائے۔

ایم کیو ایم پاکستان کی رابطہ کمیٹی نے شیر شاہ کراچی میں دھماکے پر متعدد افراد کے جاں بحق ہونے پر افسوس کا اظہار کرتے ہوئے کہا ہے کہ اللہ مرحومین کو اپنے جوار رحمت میں جگہ اور لواحقین کو صبر جمیل عطا فرمائیں۔