پاکستان تحریک انصاف کے چیئرمین عمران خان نے کہا ہے کہ پی ٹی آئی کے تنظیمی ذمہ داران ہر سطح پر خود کو منظم اور آئندہ کے سیاسی چیلنجز سے نبرد آزما ہونے کی تیاری کریں۔

چیئرمین پاکستان تحریک انصاف کی زیر صدارت سنٹرل ایگزیکٹو کمیٹی کا اہم ترین اجلاس منعقد ہوا جس میں وائس چیئرمین شاہ محمود قریشی اور مرکزی سیکریٹری جنرل اسد عمر سمیت دیگر اراکین نے شرکت کی۔

اجلاس میں تحریک انصاف کے آئین پر نظرِثانی کیلئے قائم کردہ خصوصی کمیٹی کی پیش کردہ سفارشات پر غور  کیا گیا۔

چیئرمین پاکستان تحریک انصاف نے نظرِثانی کمیٹی کی سفارشات کی روشنی میں نئی آئینی اسکیم کی منظوری دے دی۔

مرکزی سیکریٹری جنرل کی قیادت میں نئے نامزد کردہ ذمہ داران کو نچلی ترین سطح تک تنظیم سازی کا عمل جلد از جلد مکمل کرنے کی فوری ہدایت کی گئی۔

اس موقع پر چیئرمین تحریک انصاف عمران خان نے کہا کہ پی ٹی آئی وفاقِ پاکستان کی مقبول اور منظم ترین سیاسی قوت ہے۔

انہوں نے کہا کہ سیاسی و انتظامی طور پر نچلی ترین سطح تک عوام کو بااختیار بنانے کے ہدف کی جانب بڑھ رہے ہیں۔

چیئرمین تحریک انصاف نے کہا کہ قومی تعمیر و ترقی کے عمل میں سماج کے غریب طبقے کی بہبود پر خصوصی توجہ دے رہے ہیں۔

انکا کا کہنا تھا کہ صحت کارڈ سے سستے راشن کی اسکیموں تک حکومت فلاحی ریاست کی طرز پر عوامی بہبود پر غیر معمولی وسائل صرف کررہی ہے۔

چیئرمین تحریک انصاف نے کہا کہ کارکنان تحریک انصاف کی حکومت کے فلاحی منصوبوں کے ثمرات عوام تک پہنچانے کے عمل میں شرکت کریں۔

انہوں نے مزید کہا کہ تحریک انصاف کے تنظیمی ذمہ داران ہر سطح پر خود کو منظم اور آئندہ کے سیاسی چیلنجز سے نبرد آزما ہونے کی تیاری کریں۔