شہباز گل نے کہا ہے کہ عمران خان کے دور میں پاک امارات تعلقات کو نئی جہت ملی ہے۔

وزیر اعظم کے معاون خصوصی برائے سیاسی ابلاغ شہباز گل نے سماجی رابطے کی ویب سائٹ ٹویٹر پر اپنے ایک پیغام میں کہا کہ متحدہ عرب امارات کے قومی دن پر انکی قیادت اور عوام کو نیک خواہشات اور مبارکباد پیش کرتے ہیں۔

متحدہ عرب امارات کے قومی دن پر انکی قیادت اور عوام کو نیک خواہشات اور مبارکباد پیش کرتے ہیں

وزیراعظم عمران خان کے دور میں پاک-امارات تعلقات کو نئی جہت ملی ہے اور انشاللہ آنے والے وقت میں ہمیشہ ایک دوسرے کا ساتھ دینے والے پاک امارات مثالی برادرانہ تعلقات مزید مستحکم ہوں گے

Advertisement

— Dr. Shahbaz GiLL (@SHABAZGIL) December 2, 2021

شہباز گل کا مزید کہنا تھا کہ وزیراعظم عمران خان کے دور میں پاک-امارات تعلقات کو نئی جہت ملی ہے اور انشاللہ آنے والے وقت میں ہمیشہ ایک دوسرے کا ساتھ دینے والے پاک امارات مثالی برادرانہ تعلقات مزید مستحکم ہوں گے۔

دوسری جانب متحدہ عرب امارات کے 50ویں قومی دن کے موقع پر منعقدہ تقریب میں وزیر خارجہ شاہ محمود قریشی نے اظہارِ خیال کرتے ہوئے کہا کہ آج ہم نہ صرف متحدہ عرب امارات کے اتحاد کی گولڈن جوبلی منا رہے ہیں بلکہ اس وقت پاکستان اور متحدہ عرب امارات کے درمیان سفارتی تعلقات کو بھی 50 سال مکمل ہو گئے ہیں۔

شاہ محمود قریشی نے کہا کہ میں پاکستان کی قیادت کی طرف سے متحدہ عرب امارات کی قیادت کو تہہ دل سے مبارکباد پیش کرتا ہوں۔ پاکستان اور متحدہ عرب امارات کے درمیان بہترین برادرانہ تعلقات ہیں جو مشترکہ ورثے اور کثیر جہتی تعاون پر مبنی ہیں۔

وزیر خارجہ کا کہنا تھا کہ متحدہ عرب امارات نے جو فقیدالمثال ترقی کے مدارج طے کیے ہیں وہ متحدہ عرب امارات کے بانی محترم شیخ زاید بن سلطان النہیان کی دور اندیش قیادت کے بغیر ممکن نہیں تھے۔ اس عظیم رہنما کو پاکستان سے بہت لگاؤ ​​تھا۔ انہوں نے پاکستان میں بہت سے سماجی و اقتصادی منصوبوں میں ذاتی دلچسپی لی اور پاکستانی ورکرز کو متحدہ عرب امارات میں کام کرنے کا موقع دیا۔ یہ پاکستانی، پاکستان اور متحدہ عرب امارات کے درمیان ایک مضبوط پل کا کردار ادا کرتے ہیں۔

شاہ محمود قریشی نے کہا کہ عمران خان کے وزیر اعظم منتخب ہونے کے بعد پاکستان اور یو اے ای کے تعلقات مزید مضبوط ہوئے۔ وزیر اعظم عمران خان اور عزت مآب محمد بن زید النہیان کے بار بار ہونے والے دوروں نے ہمارے دوطرفہ تعلقات میں مزید وسعت پیدا کی ہے۔