وزیر مملکت اطلاعات و نشریات فرخ حبیب نے کہا ہے کہ کورونا کے باعث مہنگائی میں اضافہ ہواہے۔

فرخ حبیب نے اسلام آباد میں وزارت خزانہ کے ترجمان مزمل اسلم کے ہمراہ  مشترکہ پریس  کانفرنس کرتے ہوئے کہاکہ مہنگائی کو مستقل بنیادوں پر کنٹرول کرنے کیلئے حکومت ٹھوس اقدامات کررہی ہے ۔

انہوں  نے کہا کہ غریب عوام پربوجھ کم کرنے کیلئے حکومت نے مختلف اشیائے ضروریہ کی درآمد پرٹیکس اور ڈیوٹی میں کمی کردی ہے ۔

وزیر مملکت اطلاعات و نشریات نے کہا کہ پیٹرولیم مصنوعات کی قیمتوں کی مد میں حکومت 4 ارب روپے کا بوجھ برداشت کررہی ہے ۔

 فرخ حبیب نے کہا کہ ذخیرہ اندوزوں کے خلاف بروقت اقدام سے چینی کی قیمتوں میں کمی آئی ہے جبکہ آٹے کی قیمت میں استحکام ہے۔

انہوں نے کہا کہ تازہ اعدادوشمار کے مطابق کورونا کی وجہ سے دنیا بھر میں مہنگائی آئی ہے اوراس کی وجہ سے زندگی بری طرح متاثرہوئی ہے ۔ دنیامیں مہنگائی کا50سالہ ریکارڈٹوٹ گیا، یورپی ممالک میں مہنگائی میں 5فیصد جبکہ امریکامیں6فیصداضافہ ہوا۔

فرخ حبیب کا کہنا تھا کہ چینی کے بحران میں سندھ حکومت کی نااہلی نظرآئی ، سندھ حکومت نےجان بوجھ کرشوگرملز میں کرشنگ رکوائی۔

وزیر مملکت اطلاعات و نشریات فرخ حبیب کا مزید کہنا تھا کہ سندھ میں سب پیسہ بنانےمیں لگےہیں،حکومت نام کی کوئی چیزنہیں۔ سائیں سرکار سندھ کےکسانوں کی دشمن کیوں بنی ہوئی ہے، سندھ کے کسان کو پانی نہیں ملتا،ملبہ وفاق پر ڈال دیتےہیں۔

اس موقع پر مزمل اسلم نے جلد خراب ہونے والی اشیاء کی پاکستان میں مہنگائی کی شرح میں تین اعشاریہ پانچ فیصد تک کمی پراطمینان کااظہار کیا ۔