پالیسی ریٹ میں اضافہ تشویشناک ہے، فوری کمی کی جائے: لاہور چیمبر

محمد سدھیر چوہدری

15th Dec, 2021. 06:22 pm
شيئر
- Font size
  - Small
  - Medium
  - Large
- Dark Mode
- Save
- Print

آرٹیکلز

Now Reading:

پالیسی ریٹ میں اضافہ تشویشناک ہے، فوری کمی کی جائے: لاہور چیمبر

لاہور چیمبر آف کامرس اینڈ انڈسٹری نے اسٹیٹ بینک آف پاکستان کی جانب سے پالیسی ریٹ میں ایک فیصد اضافے پر تشویش کا اظہار کرتے ہوئے خدشہ ظاہر کیا ہے کہ اس سے کاروباری لاگت کم کرنے اور صنعتی وسعت کے لیے اٹھائے جانے والے اقدامات کو دھچکا لگے گا۔

ایک بیان میں لاہور چیمبر کے صدر میاں نعمان کبیر، سینئر نائب صدر میاں رحمٰن عزیز چن اور نائب صدر حارث عتیق نے کہا کہ زیادہ کاروباری لاگت اور کورونا کے بعد صنعت و تجارت کے لیے پیدا شدہ صورتحال کے پیش نظر اسٹیٹ بینک آف پاکستان کی جانب سے پالیسی ریٹ میں کمی متوقع تھی، لیکن اس کے برعکس قدم اٹھاتے ہوئے پالیسی ریٹ میں مزید ایک فیصد اضافہ کردیا گیا، جس کے بعد اس کی شرح 9.75فیصد ہوگئی ہے۔

انہوں نے کہا کہ ہم ان ممالک کا مقابلہ کرنے کا تصور بھی کیسے کر سکتے ہیں جہاں پالیسی ریٹ صفر یا ایک فیصد سے کم ہے۔

ان کا مزید کہنا تھا کہ پاکستان میں پالیسی ریٹ خطے کے دیگر ممالک سے کافی زیادہ ہوگئی ہے جس کی وجہ سے صنعتوں کے لیے فنانس تک رسائی مزید مشکل ہوگئی ہے۔

لاہور چیمبر کے عہدیداروں نے کہا کہ اسٹیٹ بینک آف پاکستان صورتحال کا ادراک کرتے ہوئے پالیسی ریٹ میں کم از کم چار سو بیسز پوائنٹس کی کمی کرے۔