یورپ اور برطانیہ میں موسم سرما کی آمد کے ساتھ قدرتی گیس کی قیمت ریکارڈ سطح پر پہنچ گئی ہے۔ 

غیر ملکی خبر رساں ایجنسی کے مطابق سرد موسم کی آمد کے ساتھ ہی یورپ اور برطانیہ میں قدرتی گیس کی قیمتیں تاریخ کی بلند ترین سطح پر پہنچ گئیں ہیں۔

مارکیٹ کے اعداد و شمار سے ظاہر ہوتا ہے کہ آج کاروبار کے ابتدائی چند گھنٹوں میں ہی  ڈچ ٹی ٹی ایف گیس کی قیمت 162 اعشاریہ 775 یورو فی میگا واٹ پر پہنچ گئی، جو کہ گزشتہ روز کے مقابلے میں 10 فیصد سے زائد ہے۔

برطانیہ میں آج گیس کی قیمت 408 اعشاریہ 30 پینس فی تھرم ( برطانیہ میں مستعمل حرارت کی ایک اکائی) تک چلی گئی۔ دونوں مارکیٹوں میں آج گیس کی قیمت نے رواں سال اکتوبر کا ریکارڈ بھی توڑ دیا ہے، جو کہ 2021 کے آغاز سے 7 گنا زائد ہے۔

گیس کے ساتھ ساتھ دیگر اہم اشیائے ضروریہ بشمول خام تیل کی بے قابو ہوتی قیمتوں سے دنیا بھر میں مہنگائی کی شرح میں اضافے کے خطرات لاحق ہوگئے ہیں۔

معاشی ماہرین کے مطابق گیس کی قیمتوں میں اضافے کی وجوہات میں شدید سرد موسم کے ساتھ ساتھ جغرافیائی سیاسی حالات بھی ہیں۔ روس یورپ میں قدرتی گیس کا ایک بڑا سپلائر ہے لیکن برطانیہ اور یورپ کے ساتھ اس کے تعلقات تناؤ کا شکار ہیں۔

معاشی ماہرین نے اس صورت حال کو سنگین قرار دیتے ہوئے کہا ہے کہ سردیوں کی آمد کے ساتھ یورپ میں درجہ حرارت گرتا جا رہا ہے اور خبریں یہ ہے کہ روس کی بڑی انرجی کمپنی گیزپروم نے براستہ یوکرائن گیس کی اضافی گنجائش کے لیے ابھی تک کوئی بکنگ نہیں کی ہے۔

جب کہ یورپ اپنی ذخیرہ کی گئی گیس کو گزشتہ سال طویل مدت تک جاری رہنے والے سرد موسم میں استعمال کر چکا ہے۔

بین الاقوامی تعلقات اور معیشت پر نظر رکھنے والے تجزیہ کاروں  نے گیس کی قدر میں اضافے کی وجہ روس کی نارڈ اسٹریم 2 گیس پائپ لائن پر جاری تنازع کو بھی قرار دیا ہے۔

جرمنی کے وزیر برائے معاشی امور روبرٹ ہیبیک نے گزشتہ ہفتے ہی روس کو وارننگ دی تھی کہ اگر ماسکو نے یوکرائن پر حملہ کیا تو اسے نارڈ اسٹریم 2  گیس پائپ لائن پر ’ سنگین نتائج ‘ کا سامنا کرنا پڑے گا۔

نارڈ اسٹریم 2  گیس پائپ لائن تنازع کیا ہے؟

یہ بحیرہ بالٹک میں جرمنی کو روس سے سستی قدرتی گیس کی دوہری فراہمی کے لیے پائپ لائن منصوبہ ہے۔ لیکن 10 ارب یورو(12 ارب ڈالر) کا یہ منصوبہ کئی سالوں سے تاخیر کا شکار ہے کیوں کہ اسے جرمنی کے اتحادی ممالک پولینڈ اور امریکا کی جانب سے سخت تنقید کا سامنا ہے۔

اس منصوبے کے ناقدین کہنا ہے کہ نارڈ اسٹریم 2 گیس پائپ لائن سے یورپ کا روسی گیس پر انحصار بڑھ جائے گا جب کہ یوکرائن نے اسے ’ جغرافیائی سیاسی ہتھیار‘ قرار دیا ہے۔

واضح رہے کہ یورپ اپنی گیس کی ضروریات کا تین چوتھائی روس سے حاصل کرتاہے۔