مسلم لیگ (ن) کے رہنما طلال چوہدری نے سرگودھا میں سابق رکن قومی اسمبلی چوہدری عبدالحمید کی برسی کے موقع پر خطاب میں کہا کہ ملک کے موجودہ حالات کے ذمہ دار ہم سب لوگ ہیں، کیونکہ ووٹ سوچ کر نہیں دیا گیا۔

طلال چوہدری نے اپنے خطاب میں کہا کہ آئندہ الیکشن میں گھر سے نکلیں اور زیادہ سے زیادہ ووٹ کاسٹ کریں۔

ن لیگی رہنما نے کہا کہ آج غریب 35 والا آٹا 80 روپے میں خرید رہا ہے، عوام نہیں نکلیں گے تو آٹا، سبزی ہر چیز مہنگی ہو جائے گی۔ پورا ملک مہنگائی کی چکی میں پس رہا ہے خدارا عوام جاگے اور ووٹ دیانتداری سے ڈالیں۔ آپ پر فرض ہے کہ مظلوم کے ساتھ کھڑے ہوں۔

انہوں نے کہا کہ  ہم نے آزاد وطن میں قید کاٹی، ماؤں بہنوں کو کال کوٹھڑیوں میں ڈالا گیا۔

 طلال چوہدری نے کہا کہ ہم بھی آئی ایم ایف کے پاس گئے، لیکن عوام کو ریلیف دیا۔ یہ آئی ایم ایف کے پاس جاتے ہیں عوام کی مشکلات بڑھا دی جاتی ہیں۔

طلال چوہدری کہتے ہیں کہ ہماری حکومت کو کبھی دھرنے، لانگ مارچ، جعلی کیسوں میں الجھائے رکھا گیا، ہم نے ملک کو ترقی کی راہ پر گامزن کیا، عوام کو روزگار دیا۔ موجودہ حکومت کو لانے والے اب خود بھی پریشان ہیں۔

ان کا کہنا تھا کہ ن لیگی قائد عوام اور ملک کے لیے لڑ رہے ہیں۔ عمران خان اب ای وی ایم کے ذریعے الیکشن چوری کے راستے تلاش کر رہا ہے۔

رہنما مسلم لیگ (ن) نے مزید کہا کہ ای وی ایم الیکشن ہوں گے یا نہیں یہ الیکشن کمیشن نے فیصلہ کرنا ہے، الیکشن کمیشن آئینی ادارہ ہے اور یہ آئین کے متصادم کوئی فیصلہ نہیں کر سکتے، جوں جوں الیکشن قریب آ رہے ہیں حکومت چوری کے طریقے تلاش کر رہی ہے۔ دنیا کے 70 فیصد ممالک ای وی ایم  سے الیکشن ترک کر چکے ہیں، چند ممالک میں جزوی طور پر الیکشن ای وی ایم سے کروائے جاتے ہیں۔

انہوں نے کہا کہ عمران خان عوام کی خدمت کی طرف توجہ دیں، ای وی ایم ڈرامہ نہیں چلے گا مہنگائی کی طرف توجہ دیں، عوام مہنگائی کے باعث پریشان ہیں اور یہ ای وی ایم مشینوں کے چکر میں ہیں۔