بھارت کے پہلے چیف آف ڈیفنس اسٹاف (سی ڈی ایس) جنرل بپن راوت کی بدھ کو ہیلی کاپٹر حادثے میں ہلاکت کے بعد نئے سی ڈی ایس کیلئے دو نام سامنے آگئے۔

بھارتی میڈیا کے مطابق جنرل بپن راوت کی ہلاکت کے بعد سی ڈی ایس کا عہدہ کے لیے اگلے سات سے نو دن میں اعلان کیا جائے گا۔

بھارتی میڈیا کے مطابق بتایا جا رہا ہے کہ اس عہدے کے لئے جنرل منوج مکند نروانے اور سابق ایئر چیف مارشل آر کے ایس بھدوریا میں سے کوئی ایک اس عہدے کی کمان کو سنبھالیں گے۔

میڈیا رپورٹ کے مطابق بھارت میں سی ڈی ایس کا عہدہ سنہ 2019 میں تخلیق کیا گیا اور جنرل بپن راوت کو بطور آرمی چیف ریٹائرمنٹ کے بعد جنوری 2020 میں اس عہدے پر تعینات کیا گیا تھا۔

سی ڈی ایس کے طور پر جنرل بپن راوت بھارت کی تینوں مسلح افواج کے سربراہ بن گئے تھے، اس لیے تینوں مسلح افواج کا کوئی بھی کمانڈنگ یا فلیگ آفیسر سی ڈی ایس بن سکتا ہے۔

یہ بھی پڑھیں: جنرل بپن راوت کی ہلاکت حادثہ یا سازش؟ بھارت میں سوال کھڑے ہونے لگے

بھارتی قوائد کے مطابق سی ڈی ایس کے عہدے پر تعینات شخص تینوں مسلح افواج کے سربراہوں سے سینئر ہوتا ہے، بھارتی آرمی چیف اس وقت فضائیہ اور بحریہ کے سربراہان سے سینئر ہیں اس لیے امکان ہے کہ انہیں سی ڈی ایس تعینات کیا جاسکتا ہے۔

یہ بھی پڑھیں: جنرل بپن راوت کے ہیلی کاپٹر کو فضا میں ہی آگ لگ گئی تھی؟ ویڈیو وائرل

واضح رہے کہ رواں ہفتے ریاست تمل ناڈو کے علاقے کنور میں فوجی ہپلی کاپٹر گر کر تباہ ہوگیا تھا جس کے نتیجے میں ہیلی کاپٹر میں سوار 13 افراد ہلاک ہوگئے تھے جس میں بھارتی چیف آف ڈیفنس اسٹاف جنرل بپن راوت اور ان کی اہلیہ بھی شامل تھی۔