وزیر اعظم کی زیر صدارت وفاقی کابینہ کا اجلاس ختم ہو گیا ہے۔

وزیر اعظم عمران خان کی زیر صدارت وفاقی کابینہ کے اجلاس میں  ملکی سیاسی و معاشی صورتحال پر غور  کیا گیا۔

ذرائع کے مطابق کابینہ اجلاس میں وزیر خارجہ مخدوم شاہ محمود قریشی کی سال 2021 کی سفارتی کامیابیوں پر مبنی تفصیلی پریس کانفرنس کو وزیراعظم نے خوب سراہا۔

اجلاس میں وزیراعظم نے ہدایت جاری کی کہ تمام وزارتیں وزارت خارجہ کی طرز پر اپنی سالانہ کارکردگی کی رپورٹ عوام کے سامنے رکھیں۔

وزیراعظم نے کہاکہ پاکستان میں تعینات کوئی سفیر آئندہ وزارتِ خارجہ کو پیشگی اطلاع دیے بغیر کسی وزیر سے ملاقات نہیں کریگا۔

ذرائع کے مطابق وزارتِ خارجہ کی کلیرنس کے بعد سفراء دیگر وزراء سے ملاقات کر سکیں گے۔

ایسی تمام ملاقاتوں میں وزارت خارجہ کی جانب سے ایک نمائندہ بھی شریک ہوگا۔

کابینہ کا 7 نکاتی ایجنڈا

اجلاس میں ملکی معاشی اور سیاسی صورتحال سمیت 7 نکاتی ایجنڈے پر غور کیا گیا۔

ذرائع کے مطابق کابینہ نے متعدد نکات کی منظوری دے دی۔

 اجلاس میں عالمی وبا کورونا کی صورتحال ، پھیلاؤ اور ویکسی نیشن کے معاملات پر غور کیا گیا۔

اجلاس میں  وفاقی کابینہ کے اراکین کو ای وی ایم کے معاملے پر بھی بریفنگ دی گئی ۔

وفاقی کابینہ اجلاس میں پاکستان برطانیہ کے درمیان ملزمان کی حوالگی پر بھی بات ہوئی، وزارت داخلہ کی جانب سے ملزم عبدالقادر احسان کی پاکستان سے یوکے حوالگی کی سمری پیش کی گئی ۔

وفاقی کابینہ اجلاس میں نیشنل انسٹیٹیوٹ آف انٹیلی جینس اینڈ سیکیورٹی اسٹڈیز کے قیام کی سمری پیش کی گئی۔

قائد اعظم یونیورسٹی اسلام آباد میں نیشنل انسٹیٹیوٹ آف انٹیلی جینس اینڈ سیکیورٹی اسٹڈیز کی قیام کی تجویز دی گئی ۔

کراچی پورٹ ٹرسٹ کے چیئرمین کی دو سال کےلئے تقرری کی منظوری ایجنڈا میں شامل تھی ۔

پاکستان ٹوبیکو بورڈ کے نوٹی فکیشن کی منظوری کابینہ ایجنڈا کا حصہ تھی۔

پاکستان ادارہ شماریات میں 3 ممبران کی تقرری کا معاملہ بھی کابینہ اجلاس میں منظوری کے لیے پیش کیا گیا۔

سی پیک اتھارٹی اور چینی وزارت ماحولیات کے درمیان مفاہمتی یاداشت کی ایکس پوسٹ فیکٹو منظوری ایجنڈا میں شامل تھی۔

رواں مالی سال کے گزشتہ چھ ماہ میں اضافی اخراجات کی سٹیٹمنٹ جاری کرنے کی منظوری بھی  دی گئی۔