احسن اقبال نے کہا ہے کہ نواز شریف سے متعلق ڈیل کی وضاحت دینے پر ڈی جی آئی ایس پی آر کا شکریہ ادا کرتے ہیں۔

کراچی میں میڈیا سے گفتگو کرتے ہوئے مسلم لیگ ن کے رہنما کا کہنا ہے کہ مسلم لیگ ن ڈیل کی سیاست پر نہیں بلکہ ووٹ اور آئین کی سیاست پر یقین نہیں رکھتی ہے۔ ہم نے متعدد بار کہا ہے کہ ہماری کسی سے ڈیل نہیں ہوئی۔

احسن اقبال نے کہا کہ  ڈیل کون کر رہا ہے اس کا جواب ڈیل کرنے والے ہی دے سکتے ہیں۔ ہم ڈیلوں کی منڈی کا رخ نہیں کرتے۔ سودے سے باخبر نہیں ہیں لیکن ہمیں ڈیل کی سیاست کو دفن کر کے ووٹ کی سیاست کو بالادست کرنا ہے۔

رہنما مسلم لیگ ن نے کہا کہ رپورٹ آنے کے بعد عمران خان کا وزیراعظم رہنا نظام عدل پر بہت بڑاسوال ہے۔ ہم چیف جسٹس آف پاکستان سے مطالبہ کرتے ہیں عمران خان کو وزیراعظم کے عہدے سے ہٹایا جائے۔

انھوں نے کہا کہ الیکشن کمیشین میں جھوٹ بولنے اور چندے بٹور کر خفیہ اکاؤنٹس بنانے والے کو صادق اور امین کہا جاتا ہے؟ عمران خان نے خود کہا تھا کہ وزیراعظم پر الزام ہو تو اسے فوری استعفی دے دینا چاہیے۔

احسن اقبال نے کہا کہ ایک وزیراعظم کو بیٹے کی کمپنی سے تنخواہ نہ لینے پر نااہل کیا گیا جبکہ اوور سیز پاکستانیوں سےدھوکا کرنے والے کو نااہل نہیں کیا جاتا۔  قوم کے ساتھ دھوکے کا حساب لیا جانا چاہیے۔

رہنما مسلم لیگ نے کہا کہ عمران خان اپنی کرپشن بچانے کیلئے اسٹیٹ بینک کو گروی رکھ  رہے ہیں۔ اسٹیٹ بنک کا قانون پاس کروا کر عمران خان گورنر اسٹیٹ بنک کو خوش کر کے این آر او لینا چاہتے ہیں۔ ہم انھیں این آر او نہیں لینے دیں گے۔

انھوں نے کہا کہ کلین چٹ کے لیےاسٹیٹ بنک کی خود مختاری کا سودا نہیں ہونے دیں گے۔ چپڑاسیوں کے نام پر پیسے منگوا کرذاتی مقصد کیلئے استعمال کیے گئے۔

احسن اقبال نے مذید کہا کہ عمران نیازی نے آئی ایم ایف کے آگے سرنڈر کر کے ملک کی معیشت کی اینٹ سے اینٹ بجا دی ہے۔ قوم ملکی خود مختاری کا سودا نہیں کرنے دے گی۔