قومی ٹیم کے فاسٹ بولر اور پشاور زلمی کے کپتان وہاب ریاض کا کہنا ہے کہ ملک کے لیے کھیلنا ہر کھلاڑی کی خواہش ہوتی ہے۔

پشاور زلمی کے کپتان وہاب ریاض نے کہا ہے کہ کورونا وبا کے دوران پی ایس ایل 7 کا انعقاد ایک چیلنج ہے، ایونٹ میں ہماری ٹیم پشاور زلمی مضبوط ہے اور بھرپور جدوجہد کریں گے جب کہ سپر لیگ کے مقابلے سخت اور دلچسپ متوقع ہیں۔

پشاور زلمی کے کپتان کا کہنا تھا کہ آخری وقت میں اسکواڈ میں زیادہ تبدیلیاں کافی چیلنجنگ ہیں، بطور ٹیم ہمارا فوکس صرف جیت پر ہے، ماضی میں فتح کے قریب پہنچ کر ٹرافی نہ جیت سکے، اس سال جیت کے لیے بہت پر امید ہیں۔

ایک سوال کے جواب میں وہاب ریاض کا کہنا تھا کہ ملک کے لیے کھیلنا ہر کھلاڑی کی خواہش ہوتی ہے، پاکستان کے لیے مزید تین سال کھیل سکتا ہوں۔

قومی ٹیم کے فاسٹ بولر نے کہا کہ پاکستان سپر لیگ کے اس سیزن میں بھی ٹاس کا کردار اہم ہوگا، پچ کے حساب سے ٹیم تشکیل دیں گے، امید ہے کہ غیر ملکی کھلاڑی بھی ٹیم کو جلد جوائن کرلیں گے، میں بہت جنونی ہوں، اسی لیے آج بھی کرکٹ کھیل رہا ہوں۔

وہاب ریاض نے مزید کہا کہ کورونا سے بچاؤ کے لیے سب کو ایس او پیز پر عمل کرنا ہوگا، مکمل ہوٹل بک ہونا اچھا عمل ہے۔ حارث رؤف، محمد حسنین اور شاہین شاہ آفریدی اچھے بولر ہیں، ان کے لیے نیک خواہشات ہیں مگر میرا کسی نوجوان بولرسے نہیں بلکہ خود سے مقابلہ ہے، بائیو سیکور ببل کا ماحول پچھلے سال کی نسبت بہتر ہے۔