کھیلوں کی دنیا میں شہنشاہ کھیل فٹ بال ہے ، جس میں پیسے کی فراوانی انتہائی غیر معمولی ہے، یہ کھیل نہ صرف کلب بلکہ کھلاڑیوں اور اسٹیڈیم کے لئے بھی معقول آمدنی کا ذریعہ بنتا ہے۔

ملکوں کی فٹ بال فیڈریشنز کے پاس اتنا سرمایہ نہیں ہوتا جتنا سرمایہ ایک فٹ بال کلب کے پاس ہوتا ہے، بعض فٹ بال کلبز تو کھلاڑیوں پر دولت کے انبار نچھاور کرنے کے باوجود امیر ترین کلبز میں شمار ہوتے ہیں۔

ان کلبز کی آمدنی کا اندازہ اس بات سے لگایا جا سکتا ہے کہ تیسری دنیا کے کئی ممالک کی مجموعی جی ڈی پی بھی ان کلبز کی آمدنی کے آگے کوئی معنیٰ نہیں رکھتی۔

اسپین سے تعلق رکھنے والا فٹ بال کلب بارسلونا گزشتہ کچھ عرصے سے شدید مالیاتی بحران کا شکار رہا جس کی وجہ سے کلب کو بعض ناقابل تصور فیصلے کرنے پڑے۔

مشہور فٹ بالر لائنل میسی کی رخصتی کے بعد کھلاڑیوں کی خریدوفروخت میں بھی بارسلونا فٹ بال کلب کا ہاتھ تنگ ہی نظر آیا۔

بارسلونا کلب کے بورڈ ممبران نے اس امید کے ساتھ صبر کا دامن ہاتھ سے نہیں چھوڑا کہ بہت جلد ان کی تجوری بھی دولت سے بھر جائیں گی۔ اس کے لئے انہوں نے کھلاڑیوں سے کفالتی معاہدے بھی کئے۔

بارسلونا کلب کے مرکزی اسپانسر ’راکوٹین‘ سے معاہدے میں ابھی کچھ وقت باقی ہے لیکن اچھے دنوں نے بارسلونا کلب کے دروازے پر ابھی سے دستک دینا شروع کر دی ہے۔

آج سے صرف تین دن قبل بارسلونا فٹ بال کلب کو فٹ بال کی تاریخ کی سب سے بڑی اسپانسر شپ کی پیشکش ہوئی ہے ، جو کہ 80 ملین پاؤنڈز کی خطیر رقم پر مشتمل ہے۔

بارسلونا کی انتظامیہ نے اس بات کی تصدیق کی ہے کہ انہیں ایک بڑی اسپانسر شپ کی پیشکش ہوئی ہے ، لیکن انتظامیہ نے ابھی تک کمپنی کے نام سے آگاہ نہیں کیا۔

مالی مشکلات سے نبرد آزما کے لئے یہ پیشکش کسی طاقتور انجکشن سے کم نہیں ہے ، بارسلونا انتظامیہ کا کہنا ہے کہ ابھی وہ اس پیشکش کا جائزہ لے رہے ہیں، ڈیل فائنل ہوتے ہی میڈیا کو بتا دیا جائے گا۔

اگر یہ اسپانسر شپ بارسلونا لینے میں کامیاب ہو جاتا ہے تو یہ فٹ بال کی تاریخ کی سب سے بڑی اسپانسر شپ ڈیل ہو گی۔

بارسلونا اس ڈیل کے بعد اپنے کلب کے لئے بہترین کھلاڑیوں کو خرید سکتا ہے۔