چوہدری محمد سرور نے کہا ہے کہ وزراء کی رینکنگ پر لب کشائی کرنا مناسب نہیں۔

گورنر پنجاب چوہدری محمد سرور نے پریس کانفرنس کرتے ہوئے کہا ہے کہ پاک امارات تعلقات بہت تاریخی اور دوستی کے رشتوں سے منسلک ہیں، امارات کے رہنما شیخ زاید نہ صرف مشرق وسطی بلکہ پوری دنیا کے رہنما ہیں، پاکستان اور امارات میں تجارت کے رشتے مزید مضبوط ہوں گے۔

انہوں نے کہا کہ پاکستان بھارت کو غربت ختم کرنے کیلئے بات چیت کرنی چاہیے، دونوں ملکوں میں تجارت ہوگی تو مسائل ختم ہوں گے، پاکستانی اور بھارتی عوام میں محبت کا رشتہ ہے، ہمیشہ بھارت میں عوام نے پاکستانیوں کا فراخ دالانہ استقبال کیا ہے، البتہ کشمیر میں انسانی حقوق کی خلاف ورزیاں بند ہونی چاہئیں۔

چوہدری محمد سرور نے کہا ہے کہ شاہ محمود قریشی اور فواد چوہدری نے بھی اچھی کارکردگی دیکھائی، وزراء کی کارکردگی جانچنے کے طریقہ کار سے واقف نہیں ہوں، وزراء کی رینکنگ پر لب کشائی کرنا مناسب نہیں۔

گورنر پنجاب چوہدری محمد سرور نے کہا ہے کہ میں جمہوریت پسند ہوں،الیکشن لڑنا سیاست دانوں کا کام ہے، اداروں کی عزت و توقیر میں اضافہ ہوگا، اداروں کی عزت ہی غیرجانبداری میں ہے۔

انہوں نے کہا کہ تحریک عدم اعتماد ناکام ہوگی، اتحادیوں کا اعتماد عمران خان پر ہے، اپوزیشن کو مایوسی ہوگی۔