امریکا نے دعویٰ کیا ہے کہ روس یوکرائن پر حملے کا بہانہ تلاش کرنے کے لیے جو سازش کر رہا ہے، اس کے ثبوت اس نے حاصل کرلیے ہیں۔

امریکی محکمہ دفاع پینٹاگون کے ترجمان جان کربی نے صحافیوں کو بتایا کہ امریکا کے پاس ایسے شواہد موجود ہیں جن سے ظاہر ہوتا ہے کہ روس نے یوکرائنی فوج کے ذریعے روسی علاقے میں یا روسی بولنے والوں کے خلاف جعلی حملے کی فلم بنانے کی سازش تیار کی ہے۔

ترجمان جان کربی کا کہنا تھا کہ ہمیں یقین ہے کہ حملے کا جواز فراہم کرنے کے لیے روس جعلی حملے کی ایک گرافک پروپیگنڈہ وڈیو تیار کرے گا جس میں لاشیں، سوگ، قتل و غارت گری اور تباہ شدہ مقامات کے مناظر پیش کرنے کی کوشش کی جائے گی۔

امریکی حکام نے یوکرائنی حکام اور اپنے یورپی اتحادیوں کے ساتھ ایک مشترکہ خفیہ معلومات میں اس مبینہ آپریشن کا انکشاف کیا ہے۔

جان کربی نے مزید کہا کہ ماضی میں بھی روسیوں کی جانب سے اس قسم کی سرگرمیاں دیکھی گئی ہیں تاہم انہوں نے یہ بھی اعتراف کیا کہ روسی حکومت کی اعلیٰ ترین سطح پر اس نوعیت کے اقدامات کی منظوری کم ہی دی جاتی ہے۔

ادھر روس امریکا پر الزام لگاتا آیا ہے کہ وہ نیٹو کی مشرقی یورپ میں توسیع کے لیے خطے میں مزید فوجیوں کو تعینات کرکے کشیدگی میں اضافہ کر رہا ہے۔

اُدھر نیٹو سیکرٹری جنرل ژینز اسٹولٹن برگ نے خبردار کیا ہے کہ یوکرائنی سرحدوں پر روسی افواج کی تیاری جاری ہے۔ انہوں نے کہا کہ روس کے اتحادی بیلا روس میں روسی فوجیوں کی تعداد 30 ہزار تک بڑھنے کا امکان ہے۔

انہوں نے کہا کہ بیلا روس میں تعینات روسی فوج کو جدید لڑاکا طیاروں، کم فاصلے تک مار کرنے والے بیلسٹک میزائل اور زمین سے فضا میں مار کرنے والے ایس 400 دفاعی میزائل نظام کی مدد حاصل ہے۔