ایگریکلچرٹرانسفارمیشن پلان ایک انقلابی منصوبہ ہے جس سےفصلوں کے پیداواری اہداف کے حصول میں مدد ملے گی۔

وزیر زراعت پنجاب سید حسین جہانیاں گردیزی کا کاشتکاروں کو زرعی آلات کی رعائتی قیمت پر فراہمی کے سلسلہ میں منعقدہ تقریب سے  خطاب کرتے ہوئے کہنا تھا کہ ایگریکلچر ٹرانسفارمیشن پلان وزیر اعظم عمران خان کا ایک انقلابی منصوبہ ہے۔

 جس کے تحت مشینی زراعت کے فروغ سے فصلوں کی پیداوار بڑھانے میں مدد ملے گی۔ کاشتکاروں کو سبسڈی پرزرعی آلات و مشینری کی فراہمی کا یہ منصوبہ حکومت پنجاب کی کسان دوست پالیسیوں کا عکاس ہے۔

ان کا مزید کہنا تھا کہ  کاشتکاروں کے فی ایکڑ پیداواری اخراجات میں کمی اورمنافع میں اضافہ کے ذریعے دیہی آبادی خوشحال ہوگی اور ملکی معیشت کو استحکام حاصل ہوگا۔

صوبائی وزیر برائے زراعت کا کہنا تھا کہ مشینی زراعت کے فروغ سے کاشتکارزمین کی تیاری سے فصلوں کی کاشت و برداشت تک کاشتی امور کی بروقت انجام دہی ممکن بناسکتے ہیں۔ زرعی مشینری کے استعمال سے فصلوں کی کاشت کے وقت زرعی مداخل کے بہتر استعمال کے ذریعے توانائی اور وقت کی بچت ہوگی۔

واضح رہے، وزیر اعظم پاکستان کے ایگریکلچر ٹرانسفارمیشن پلان کے تحت مشینی کاشت کو فروغ دینے اور فصلوں کی فی ایکڑ پیداوار میں اضافہ کیلئے صوبہ پنجاب کے تمام اضلاع میں 3190 کاشتکاروں کو مختلف اقسام کے زرعی آلات فراہم کئے جارہے ہیں اور اس پانچ سالہ منصوبہ کیلئے 8 ارب77کروڑ روپے سے زائد کی خطیررقم مختص کی گئی ہے۔

علاوہ ازیں، وزیراعظم پاکستان کے ایگریکلچر ٹرانسفارمیشن پلان کے تحت کے جنوبی پنجاب کے11اضلاع کے کاشتکاروں کو بھی زرعی آلات کی خرید کیلئے 60 فیصد سبسڈی فراہم کی جارہی ہے اور ایک کاشتکار کو5 لاکھ روپے تک سبسڈی فراہم کی جائے گی۔