پاکستان سپر لیگ سیزن 7 میں کراچی کنگز نے ناکامیوں کا ناقابل یقین ریکارڈ بنا ڈلا، جس پر خود فرنچائز مالکان بھی حیرت زدہ ہیں۔

کراچی کنگز نے پی ایس ایل سیزن 7 میں مسلسل 8 میچوں میں شکست کا سامنا کیا جو اس لیگ کا ایک ریکارڈ بن چکا ہے۔

بابر اعظم کی کپتانی میں کراچی کنگز نے گزشتہ سال پی ایس ایل سیزن 6 کی ٹرافی اپنے نام کی تھی مگر رواں سال وہ پلے آف مرحلے میں بھی نہیں پہنچی۔

کراچی کنگز کی طرح بگ بیش لیگ میں سڈنی تھنڈر کی ٹیم کا نام بھی زیادہ ناکامیوں کے ساتھ لیا جاتا ہے ، بگ بیش کے افتتاحی ایونٹ کے تیسرے میچ میں شکست کے بعد تھنڈر نے 7 میچوں کے بعد کامیابی حاصل کی تھی۔

حالانکہ اس ٹیم نے 15-2014 کے سیزن میں بگ بیش ٹرافی اپنے نام کی تھی۔

کیریبئین پریمئیر لیگ کی سینٹ لوشیا ٹیم بھی 2016 سے 2018 تک کراچی کنگز جیسے حالات سے دوچار رہی ہے ، 2018 میں اس ٹیم نے چار میچوں میں شکست کے بعد کامیابی کا منہ دیکھا تھا۔

انڈین پریمئیر لیگ کی پونے وارئیرز کی ٹیم درحقیقت کبھی بھی لیگ سے مطابقت نہیں رکھتی تھی ، اپنے تین سالہ کیرئیر میں اس ٹیم نے صرف 12 میچز جیتے ہیں جبکہ 33 میچوں میں شکست کا سامنا کرنا پڑا ہے۔

دہلی ڈئیرویلز بھی آئی پی ایل کی ناکام ترین ٹیموں میں شمار کی جاتی ہے جس نے آئی پی ایل کے مسلسل 6 ایڈیشنز میں ٹاپ فور میں بھی جگہ نہ بنا سکی۔

دہلی ڈئیر ویلز کا آئی پی ایل میں  2013 سے 2015 تک کا سفر انتہائی مایوس کن رہا تھا ، ان تین سالوں میں اس ٹیم نے 44 میچوں میں سے صرف 10 میچوں میں کامیابی حاصل کی تھی۔